एलोन मस्क यांच्या नेतृत्वाखालील DOGE विभागाने अमेरिकेने निधी दिलेले अनेक आंतरराष्ट्रीय प्रकल्प रद्द केले आहेत. यामध्ये भारतातील मतदान उपक्रमासाठी दिलेल्या 21 दशलक्ष डॉलर्स निधीचा देखील समावेश होता. या निर्णयामुळे भारतातील निवडणुकांमध्ये परदेशी सहभागाबाबत वादविवाद सुरू झाला आहे. पंतप्रधान नरेंद्र मोदी यांच्या अलिकडच्या अमेरिका भेटीनंतर ही घोषणा करण्यात आली आहे.
दरम्यान, रद्द केलेल्या प्रकल्पांमध्ये निवडणूक आणि राजकीय प्रक्रिया बळकट करण्यासाठी एका संघासाठी 486 दशलक्ष डॉलर्सचा समावेश आहे. यामध्ये मोल्दोव्हाच्या राजकीय प्रक्रियेसाठी 22 दशलक्ष डॉलर्स आणि भारतातील मतदारांच्या मतदानासाठी 21 दशलक्ष डॉलर्स समाविष्ट आहेत. रद्द केलेल्या इतर उपक्रमांमध्ये मोझांबिकमध्ये वैद्यकीय सुविधांसाठी 10 दशलक्ष डॉलर्स आणि कंबोडियामध्ये युवा कौशल्य विकासासाठी 9.7 दशलक्ष डॉलर्स यांचा समावेश आहे. भाजप प्रवक्ते अमित मालवीय यांनी व्होटर टर्नआउट फंड रद्द केल्याबद्दल चिंता व्यक्त केली. त्यांनी याला भारताच्या निवडणूक प्रक्रियेत बाह्य हस्तक्षेप म्हटले.
हेही वाचा – आयात शुल्क 50 टक्के कमी करण्यात आलेली बोर्बन व्हिस्की संदर्भातील 'हे' रोचक तथ्ये तुम्हाला माहिती आहेत का?
या देशांचे निधीही रद्द करण्यात आले –
DOGE ने काढून घेतलेल्या अतिरिक्त निधीमध्ये बांगलादेशची राजकीय रचना मजबूत करण्यासाठी 29 दशलक्ष डॉलर्स, नेपाळमधील वित्तीय संघराज्यवाद आणि जैवविविधता संवर्धनासाठी 39 दशलक्ष डॉलर्स आणि लायबेरियामध्ये मतदारांचा विश्वास वाढवण्यासाठी 1.5 दशलक्ष डॉलर्सचा समावेश आहे. तसेच आशियातील शिक्षण परिणाम सुधारण्यासाठी 47 दशलक्ष डॉलर्सचा समावेश आहे.
निधी रद्द करण्याची ही लाट DOGE च्या सरकारी खर्च सुलभ करण्याच्या चालू मोहिमेचा एक भाग आहे. डोनाल्ड ट्रम्प यांच्या अध्यक्षपदाच्या काळात स्थापन झालेला हा विभाग खर्च कमी करण्याच्या महत्त्वपूर्ण उपाययोजनांवर लक्ष केंद्रित करतो. पंतप्रधान मोदींच्या अमेरिका भेटीदरम्यान, मस्क यांच्याशी नवोन्मेष, अवकाश संशोधन, कृत्रिम बुद्धिमत्ता आणि शाश्वत विकास या क्षेत्रातील द्विपक्षीय सहकार्य मजबूत करण्यावर लक्ष केंद्रित करण्यात आले. त्यांनी उदयोन्मुख तंत्रज्ञान, उद्योजकता आणि प्रशासनात सहकार्य वाढविण्यावरही चर्चा केली.
