Asias Largest Tulip Garden: रंगीबेरंगी फुले पाहण्याची आवड असलेल्यांसाठी आनंदाची बातमी आहे. कारण, आता जम्मू आणि काश्मीरची राजधानी श्रीनगर येथे असलेले आशियातील सर्वात मोठे ट्यूलिप गार्डन 26 मार्च रोजी जनतेसाठी खुले केले जाणार आहे. दल सरोवर आणि झबरवान टेकड्यांच्या दरम्यान असलेल्या ट्यूलिप बागेमुळे काश्मीर खोऱ्यातील पर्यटन हंगामाची सुरुवात होईल, असे अधिकाऱ्यांनी शुक्रवारी सांगितले. या हंगामात मोठ्या संख्येने पर्यटक येण्याची अपेक्षा आहे.
ट्यूलिप गार्डनचे सहाय्यक फ्लोरिकल्चर ऑफिसर आसिफ अहमद यांनी सांगितले की, जम्मू आणि काश्मीरचे मुख्यमंत्री ओमर अब्दुल्ला 26 मार्च रोजी हे गार्डन जनतेसाठी खुले करतील. विभागाने यावर्षी बागेत दोन नवीन प्रकारच्या ट्यूलिपची लागवड केली आहे. दरवर्षी आम्ही ट्यूलिप बागेसाठी काहीतरी नवीन करण्याचा प्रयत्न करतो. या वर्षी आम्ही ट्यूलिपच्या दोन नवीन जाती जोडल्या आहेत, ज्यामुळे गार्डमध्ये एकूण 74 जाती वाढल्या आहेत.
हेही वाचा – 'पत्नीने पॉर्न पाहणं आणि…' हे घटस्फोट मिळण्याचा आधार होऊ शकत नाही – उच्च न्यायालय
फ्लोरिकल्चर विभागाच्या अधिकाऱ्यांनी सांगितले की, 'इंदिरा गांधी मेमोरियल ट्यूलिप गार्डन' पूर्वी सिराज बाग म्हणून ओळखले जात असे. येथे वेगवेगळ्या रंगांच्या ट्यूलिप फुलांना सुरुवात झाल्याने हे उद्यान आता जनतेसाठी खुले केले जाईल. फुलशेती विभाग ट्यूलिपच्या बल्बची लागवड टप्प्याटप्प्याने करतो जेणेकरून फुले एक महिना किंवा त्याहून अधिक काळ बहरत राहतील.
ट्यूलिप गार्डनची स्थापना –
जम्मू आणि काश्मीरचे तत्कालीन मुख्यमंत्री गुलाम नबी आझाद यांनी 2007 मध्ये येथील पर्यटन हंगाम वाढवण्यासाठी 'इंदिरा गांधी मेमोरियल ट्यूलिप गार्डन' ची स्थापना केली. पूर्वी केंद्रशासित प्रदेशातील पर्यटन हंगाम फक्त उन्हाळा आणि हिवाळ्यापुरता मर्यादित होता.
