भारतीय बॉक्सिंग संघाने आंतरराष्ट्रीय स्पर्धेत दमदार कामगिरी करत एकाच दिवशी सुवर्णपदकांची अक्षरशः लयलूट केली. भारतीय खेळाडूंनी तब्बल 7 सुवर्णपदके आणि 3 रौप्यपदके जिंकत स्पर्धेत आपला दबदबा सिद्ध केला. या यशामध्ये सर्वाधिक चर्चेत राहिली ती 23 वर्षीय महिला बॉक्सर अरुंधती चौधरी, जिने प्रतिकूल परिस्थितीतही अविस्मरणीय कामगिरी करत सुवर्णपदकावर नाव कोरले.
महिलांच्या 70 किलो वजनी गटाच्या अंतिम सामन्यात अरुंधतीने इंग्लंडच्या शँटेल रीडचा पराभव करत भारताला सुवर्णपदक मिळवून दिले. विशेष म्हणजे, अंतिम सामन्यापूर्वी अरुंधतीला तब्बल 102 डिग्री ताप होता. अशा अवस्थेतही तिने हार न मानता रिंगमध्ये उतरून उत्कृष्ट खेळाचे प्रदर्शन केले आणि विजय मिळवला.
अरुंधतीच्या या यशानंतर तिच्या कुटुंबात आनंदाचे वातावरण आहे. तिच्या बहिणीने सांगितले की, ताप आणि शारीरिक त्रास असूनही अरुंधतीने स्पर्धेत उतरायचा निर्णय घेतला. कुटुंबीय तिच्या प्रकृतीमुळे चिंतेत होते, मात्र तिने जिद्द, आत्मविश्वास आणि मेहनतीच्या जोरावर सुवर्णपदक जिंकून सर्वांना अभिमानाची भावना दिली.
अरुंधतीचा प्रवास मात्र सोपा नव्हता. बॉक्सिंगची निवड केल्यानंतर तिला अनेक सामाजिक टीकांना सामोरे जावे लागले. "बॉक्सिंगमध्ये गेलीस तर नाक तुटेल, मग तुझ्याशी लग्न कोण करणार?" अशा टोमण्यांचाही तिला सामना करावा लागला होता. मात्र तिने या टीकेकडे दुर्लक्ष करत आपल्या ध्येयावर लक्ष केंद्रित केले. आज तिच्या यशामुळे त्याच लोकांकडून तिचे कौतुक होत असून गावातही तिच्या विजयाचा जल्लोष साजरा करण्यात आला.
विजयानंतर भावना व्यक्त करताना अरुंधती म्हणाली की, अनेक वर्षांपासून आंतरराष्ट्रीय स्पर्धेत भारतासाठी सुवर्णपदक जिंकून पोडियमवर राष्ट्रगीत ऐकण्याचे स्वप्न तिने पाहिले होते. अखेर ते स्वप्न पूर्ण झाल्याने हा क्षण आयुष्यातील सर्वात भावनिक आणि संस्मरणीय असल्याचे तिने सांगितले.
तिने पुढे सांगितले की, आता तिचे पुढचे लक्ष्य ऑलिम्पिकमध्येही अशीच दमदार कामगिरी करून भारतासाठी पदक जिंकण्याचे आहे. भारतीय बॉक्सिंग संघाच्या या यशामुळे देशातील युवा खेळाडूंना नवी प्रेरणा मिळाली असून आगामी स्पर्धांमध्येही अशाच यशाची अपेक्षा व्यक्त केली जात आहे.
