Stock Market Closing Bell: भारतीय शेअर बाजारात आठवड्याच्या सुरुवातीला प्रचंड अस्थिरता दिसून आली. व्यवहाराच्या सत्रात सेन्सेक्स आणि निफ्टीमध्ये सुरुवातीला मोठी घसरण झाल्याने गुंतवणूकदारांची चिंता वाढली होती. मात्र, दिवसाच्या उत्तरार्धात बाजाराने जोरदार मुसंडी मारली आणि अखेरीस तो तेजीसह बंद झाला. सेन्सेक्स आपल्या दिवसातील नीचांकी पातळीवरून सुमारे 1,100 अंशांनी वधारून 75,315.04 च्या पातळीवर बंद झाला. त्याचप्रमाणे, निफ्टीनेही सावरत 23,649.95 वर व्यवहार संपवला. या अचानक आलेल्या तेजीमुळे गुंतवणूकदारांना मोठा दिलासा मिळाला आहे.
दिवसभर प्रचंड अस्थिरता आणि रिकव्हरी
व्यवहारादरम्यान, सेन्सेक्स आणि निफ्टी या दोन्ही निर्देशांकांमध्ये सुमारे 1.3 टक्क्यांची घसरण झाली होती. सलग 6 सत्रांमध्ये बाजाराने आधीच 3.5 टक्के ते 4 टक्क्यांची घसरण अनुभवल्यामुळे गुंतवणूकदारांमध्ये भीतीचे वातावरण होते. मात्र, खालच्या पातळीवर (Low levels) खरेदी वाढल्यामुळे बाजारात वेगाने सुधारणा झाली. तज्ज्ञांच्या मते, अनेक गुंतवणूकदारांनी या घसरणीचा वापर 'बाय ऑन डिप्स' (खरेदीची संधी) म्हणून केला. विशेषतः निफ्टीला 23,300–23,400 च्या पातळीवर भक्कम आधार मिळाल्याने बाजाराचा कल बदलला.
IT आणि फार्मा शेअर्सची चमकदार कामगिरी
बाजाराला सावरण्यामध्ये IT क्षेत्राची भूमिका महत्त्वाची ठरली. यामध्ये टेक महिंद्राचे शेअर्स 3 टक्के पेक्षा जास्त वधारले, तर इन्फोसिस, विप्रो आणि HCL टेक्नॉलॉजीजमध्येही जोरदार खरेदी दिसून आली. फार्मा क्षेत्रात ग्लँड फार्माचे शेअर्स 13 टक्के पेक्षा जास्त उसळले. कंपनीच्या नफ्यात झालेल्या लक्षणीय वाढीमुळे गुंतवणूकदारांनी या शेअरला पसंती दिली. मात्र, दुसरीकडे मेटल आणि बँकिंग क्षेत्रावर दबाव होता. टाटा स्टीलचे शेअर्स सुमारे 5 टक्क्यांनी कोसळले, तर पॉवर ग्रिड आणि हिंदाल्कोमध्येही घसरण नोंदवली गेली.
हेही वाचा – Gold Silver Rate Today: सोने-चांदीच्या दरात मोठी घसरण; जाणून घ्या मुंबई, पुणे आणि दिल्लीतील आजचे ताजे दर
सुधारणेची प्रमुख कारणे आणि पुढील वाटचाल
बाजारातील या सुधारणेमागे जागतिक संकेतही कारणीभूत आहेत. अमेरिका आणि इराण यांच्यातील तणाव निवळण्याची शक्यता निर्माण झाल्यामुळे जागतिक बाजारातील भीती कमी झाली आहे. तज्ज्ञांच्या मते, जर जागतिक संकेत सकारात्मक राहिले आणि परकीय गुंतवणूकदारांची (FII) खरेदी सुरू झाली, तर येत्या काही दिवसांत बाजारात आणखी मजबूती येऊ शकते. तथापि, सध्याच्या अस्थिर वातावरणात गुंतवणूकदारांनी सावध राहून गुंतवणूक करण्याचा सल्ला दिला जात आहे.
