पश्चिम बंगालच्या राजकारणात सध्या अभूतपूर्व हालचाली घडत असून मुख्यमंत्री ममता बॅनर्जी यांच्या नेतृत्वाखालील तृणमूल काँग्रेस (TMC) पक्षात मोठी फूट पडल्याचे चित्र दिसत आहे. निवडणुकीनंतर अवघ्या काही काळातच पक्षातील अंतर्गत संघर्ष उफाळून आला असून, 80 आमदारांपैकी तब्बल 59 आमदारांनी बंडखोरीचा मार्ग स्वीकारल्याची चर्चा राजकीय वर्तुळात रंगली आहे. या घडामोडींमुळे बंगालच्या राजकारणात 'महाराष्ट्र पॅटर्न' पुन्हा एकदा चर्चेत आला असून, शिवसेना आणि राष्ट्रवादी काँग्रेसमध्ये झालेल्या फाटाफुटीची आठवण राजकीय विश्लेषकांना झाली आहे.
बंडखोर आमदारांची मोठी हालचाल
सूत्रांच्या माहितीनुसार, तृणमूल काँग्रेसमधील काही असंतुष्ट आमदारांनी एकत्र येत स्वतंत्र गट तयार करण्याचा निर्णय घेतला आहे. या गटाचे नेतृत्व पक्षातून हकालपट्टी झालेले नेते ऋतब्रता बॅनर्जी आणि संदीपान साहा करत असल्याचे समोर आले आहे. या बंडखोर आमदारांनी विधानसभा अध्यक्षांना एक महत्त्वाचे पत्र सादर केले असून, त्यात गटनेतृत्व बदलण्याची मागणी करण्यात आली आहे. या पत्रावर अनेक आमदारांच्या स्वाक्षऱ्या असल्याने राजकीय वातावरण अधिक तापले आहे.
विधानसभेत नवीन समीकरणांची शक्यता
राजकीय सूत्रांच्या माहितीनुसार, हा गट तृणमूल काँग्रेस पक्ष पूर्णपणे फोडण्याऐवजी सुरुवातीला विधानसभेत स्वतंत्र गट म्हणून ओळख मिळवण्याचा प्रयत्न करत आहे. त्यानंतर पक्षातील नेतृत्व बदलाची मागणी पुढे रेटण्याची रणनीती आखली जात आहे. या घडामोडींमुळे तृणमूल काँग्रेसच्या आत नेतृत्व संघर्ष अधिक तीव्र होत असल्याचे स्पष्ट दिसत आहे. विधानसभा अध्यक्ष या पत्रावर काय निर्णय घेतात, याकडे संपूर्ण राज्याचे लक्ष लागले आहे.
बैठकीला वेग, राजकीय तापमान वाढले
बंडखोर आमदारांनी तातडीची बैठक बोलावली असून, पुढील रणनीतीवर चर्चा सुरू आहे. विधानसभेच्या परिसरातच ही बैठक पार पडत असल्याने राजकीय हालचाली अधिक गतिमान झाल्या आहेत. या बैठकीत पुढील पाऊल काय असावे, स्वतंत्र गटाची अधिकृत घोषणा करावी का किंवा पक्षावर दबाव वाढवावा का, यावर विचारमंथन सुरू असल्याचे सांगितले जात आहे.
ममतांच्या नेतृत्वासमोर मोठे आव्हान
या संपूर्ण प्रकरणामुळे मुख्यमंत्री ममता बॅनर्जी यांच्यासमोर पक्षातील एकजूट राखण्याचे मोठे आव्हान उभे राहिले आहे. निवडणुकीनंतर पक्ष मजबूत करण्याऐवजी अंतर्गत नाराजी वाढत असल्याचे चित्र समोर येत आहे.राजकीय विश्लेषकांच्या मते, ही परिस्थिती तृणमूल काँग्रेससाठी गंभीर ठरू शकते, कारण मोठ्या संख्येने आमदारांचा असंतोष थेट पक्षाच्या नेतृत्वावर प्रश्नचिन्ह निर्माण करत आहे.
राजकीय वर्तुळात चर्चेला उधाण
या बंडखोरीच्या चर्चेमुळे पश्चिम बंगालमध्ये राजकीय वातावरण चांगलेच तापले आहे. महाराष्ट्रात ज्या प्रकारे पक्षफुटीचे राजकारण पाहायला मिळाले, तशाच प्रकारचा घटनाक्रम आता बंगालमध्ये घडत असल्याची चर्चा सुरू आहे. आगामी काही दिवसांत या घडामोडी कोणते वळण घेतात, याकडे संपूर्ण देशाचे लक्ष लागले आहे.
