SRK Real Estate Deal: बॉलिवूडचा बादशाह शाहरुख खानने दिल्लीमध्ये एक अत्यंत महत्त्वाचा रिअल इस्टेट व्यवहार केला आहे. व्यावसायिक गुंतवणुकीपेक्षा भावनिक मूल्यासाठी जास्त महत्त्वाच्या ठरलेल्या या व्यवहारात शाहरुखने दक्षिण दिल्लीतील पॉश 'पंचशील पार्क' येथील इमारतीची संपूर्ण मालकी आता स्वतःकडे घेतली आहे. या व्यवहाराचे एकूण मूल्य सुमारे 37 कोटी रुपये असल्याचे समोर आले आहे. 1991 मध्ये विवाह बंधनात अडकल्यानंतर मुंबईत स्थायिक होण्यापूर्वी शाहरुख आणि गौरी खान याच घरात एकत्र राहिले होते, ज्यामुळे या वास्तूशी त्यांच्या अत्यंत जिव्हाळ्याच्या आठवणी जोडलेल्या आहेत.
दुसऱ्या आणि तिसऱ्या मजल्याची खरेदी; आता संपूर्ण इमारतीवर शाहरुखचे नाव
या निवासी इमारतीमधील तळघर (बेसमेंट) आणि पहिला मजला आधीपासूनच शाहरुख खानच्या मालकीचा होता. आता त्याने उर्वरित दुसरा आणि तिसरा मजलादेखील विकत घेतला आहे, ज्यामुळे तो आता या पूर्ण वास्तूचा एकमेव मालक बनला आहे. मुंबईत येऊन बॉलिवूडवर अधिराज्य गाजवण्यापूर्वी शाहरुखचे दिल्लीशी असलेले घनिष्ठ नाते आणि वैवाहिक आयुष्याची पहिली वर्षे या घरात व्यतीत झाल्यामुळे खान कुटुंबासाठी ही जागा अत्यंत अमूल्य आहे. रिअल इस्टेट तज्ज्ञांच्या मते, हा निर्णय केवळ आर्थिक नफा पाहून घेतलेला नसून, जुन्या आठवणींना उजाळा देणारा एक कौटुंबिक निर्णय आहे.
गौरी खानचे इंटेरिअर डिझाईन आणि 'नॉस्टॅल्जिया वॉल' हे घराचे मुख्य आकर्षण
राजधानीतील अत्यंत महागड्या आणि उच्चभ्रू लोकांचे वास्तव्य असलेल्या पंचशील पार्क भागातील या घराची अंतर्गत सजावट स्वतः गौरी खान हिच्या डिझाईन शैलीनुसार करण्यात आली आहे. आधुनिक सोयी-सुविधांनी सज्ज असलेल्या या घरात कौटुंबिक आठवणी जतन करण्यासाठी एक विशेष 'नॉस्टॅल्जिया वॉल' तयार करण्यात आली आहे, जिथे कुटुंबाचे दुर्मिळ क्षण पाहायला मिळतात.
हेही वाचा – POCSO Act Case: मनोरंजन विश्व हादरलं! प्रसिद्ध अभिनेत्याला अटक; 16 वर्षीय मुलीचा छळ केल्याचा आरोप
मुंबईतील 'मन्नत' बंगल्याव्यतिरिक्त दुबई, लंडन आणि अलिबागमध्येही शाहरुखची मोठी रिअल इस्टेट गुंतवणूक आहे, त्यात आता दिल्लीतील या भावनिक 'घरवापसी'ची भर पडली आहे. या 37 कोटींच्या व्यवहारामुळे सध्या बॉलिवूड आणि व्यावसायिक विश्वात मोठी चर्चा रंगली आहे.
