Vinesh Phogat Comeback: भारतीय कुस्तीचा चेहरा मानल्या जाणाऱ्या विनेश फोगाटने अखेर आपल्या चाहत्यांना दिलासा देणारी घोषणा केली आहे. पॅरिस ऑलिम्पिकमधील वादग्रस्त डिस्क्वालिफिकेशन आणि त्यानंतरच्या निवृत्तीच्या निर्णयानंतर जवळपास वर्षभरानंतर विनेश पुन्हा एकदा कुस्तीच्या रंगमंचावर पाऊल ठेवण्यास सज्ज झाली आहे. स्वतःच्या ‘एक्स’ पोस्टद्वारे तिने हा निर्णय जाहीर केला आणि तिच्या शब्दांत तिचा भावनिक आणि प्रेरणादायी प्रवास स्पष्ट दिसून आला.
“आतला ज्वालामुखी कधीच विझला नव्हता” विनेश फोगाट
पॅरिस ऑलिम्पिकमधील धक्क्याने संपूर्ण देशाला वेदना दिल्या होत्या. अंतिम सामन्याच्या आधी वजन मर्यादेपेक्षा 100 ग्रॅम जास्त निघाल्याने तिचे डिस्क्वालिफिकेशन झाले आणि त्याच्या दुसऱ्याच दिवशी तिने निवृत्ती जाहीर केली. त्या क्षणापासून विनेश प्रकाशझोतातून दूर राहिली.
एका वर्षानंतर तिच्या पोस्टमध्ये ती म्हणाली, “लोक विचारत होते, पॅरिस माझ्यासाठी शेवट होता का? मलाही उत्तर माहित नव्हतं. मॅटपासून, स्पर्धेच्या दबावापासून, स्वतःच्या अपेक्षांपासून दूर राहणे मला गरजेचे होते. बराच वेळ स्वतःशी झगडल्यावर लक्षात आलं… मला अजूनही ही खेळ आवडतो.”
विनेशने सांगितले की, शांततेत तिने स्वतःकडे नव्या नजरेने पाहिले. यश, पराभव, कष्ट, जगाला न दिसलेली तिची वेदना आणि ताकद. त्या आत्मपरीक्षणात तिला जाणवले की तिच्यातील स्पर्धेची आग अजूनही ताजी आहे.
लॉस एंजेलिस 2028; नवा ध्यास
विनेशने स्पष्ट केले की तिचा पुढचा टप्पा म्हणजे लॉस एंजेलिस ऑलिम्पिक 2028.
“यावेळी मी एकटी नाही. माझा मुलगाही माझ्या संघाचा भाग आहे. त्याच्यामुळेच या पुनरागमनाला नवा अर्थ मिळाला आहे,” असे ती म्हणाली.
करिअरमधील भव्य यश
विनेश फोगाट भारतीय कुस्तीच्या इतिहासातील सर्वात यशस्वी महिला खेळाडूंपैकी एक असून तिची कर्तबगारी प्रभावी आहे—
दोन वेळा वर्ल्ड चॅम्पियनशिप ब्रॉन्झ
आशियाई चॅम्पियन
आशियाई खेळांतील सुवर्णपदक विजेती
तीन वेळा कॉमनवेल्थ गेम्समध्ये सुवर्णपदक
भारतातील अशी एकमेव महिला कुस्तीपटू जिने आशियाई आणि कॉमनवेल्थ दोन्ही स्पर्धांमध्ये सुवर्णपदक जिंकले आहे.
राजकारणामध्येही दमदार पाऊल
खेळासोबतच, विनेशने 2024 मध्ये हरियाणातील जुलाना मतदारसंघातून निवडणूक लढवली आणि काँग्रेसच्या तिकिटावर विजयी झाली. 6,000 पेक्षा जास्त मतांच्या फरकाने मिळवलेले हे यश तिच्या नेतृत्वक्षमतेची साक्ष देते.
पुढचा प्रवास किती कठीण?
निवृत्तीतून परत येणे सोपे नसते, तेही एका वर्षाच्या मानसिक आणि शारीरिक अंतरानंतर. परंतु विनेशची जिद्द, अनुभव आणि आत्मविश्वास तिच्यासाठी पुन्हा एकदा ऑलिम्पिक पदकाचा मार्ग खुला करू शकतात. भारतीय कुस्ती चाहत्यांची नजर आता तिच्या आगामी तयारीवर असेल. विनेशच्या पुनरागमनाने भारतीय खेळविश्वात पुन्हा एकदा उत्साहाचे वारे वाहू लागले आहेत.
