मुंबई: इराण-अमेरिका-इस्त्रायल संघर्षाच्या पार्श्वभूमीवर भारतीय शेअर बाजाराची आठवड्याची सुरुवात मोठ्या घसरणीसह झाली. सेन्सेक्स1018 अंकांनी घसरून 72565 वर उघडला, तर निफ्टी 269 अंकांनी घसरून 22549 पातळीवर पोहोचला. जागतिक अस्थिरतेमुळे गुंतवणूकदारांमध्ये चिंता वाढल्याचे स्पष्ट दिसून आले.
या घसरणीमागे मध्यपूर्वेत सुरू असलेला तणाव हे मुख्य कारण मानले जात आहे. या संघर्षाचा पाचवा आठवडा सुरू असून जागतिक बाजारांमध्ये अनिश्चिततेचे वातावरण आहे. त्यातच ब्रेंट क्रूडची किंमत 115 ते 120 डॉलर प्रति बॅरलपर्यंत पोहोचल्याने भारतासारख्या आयात-निर्भर अर्थव्यवस्थेवर मोठा ताण निर्माण झाला आहे.
याशिवाय परदेशी संस्थात्मक गुंतवणूकदारांची मोठ्या प्रमाणात विक्रीही बाजारावर दबाव टाकत आहे. केवळ मार्च महिन्यातच परदेशी गुंतवणूकदारांनी सुमारे 1,13,810 कोटी रुपयांचे समभाग विकले आहेत. त्याचबरोबर रुपया देखील अमेरिकन चलनाच्या तुलनेत घसरून ऐतिहासिक नीचांकी 94.82 या पातळीवर पोहोचला आहे, ज्यामुळे गुंतवणूकदारांचा आत्मविश्वास डळमळीत झाला आहे.
आशियाई बाजारांमध्येही आज मोठी घसरण दिसून आली. जपानचा निक्केई 225 निर्देशांक सुमारे 3.97 टक्क्यांनी घसरला, तर टॉपिक्समध्येही जवळपास 3.9 टक्क्यांची घट झाली. दक्षिण कोरियाचा कोस्पी निर्देशांक पाच टक्क्यांहून अधिक कोसळला, तर कोस्डॅकमध्येही जवळपास चार टक्क्यांची घसरण झाली. हाँगकाँगचा हँग सँग निर्देशांक देखील दबावाखाली राहिला.
अमेरिकन शेअर बाजारातही नकारात्मक वातावरण कायम आहे. डाऊ जोन्स औद्योगिक सरासरी 793 अंकांनी घसरून 45166 वर बंद झाला. एस अँड पी 500 मध्ये 1.67 टक्क्यांची घसरण झाली, तर नॅस्डॅक संयुक्त निर्देशांक 2.15 टक्क्यांनी खाली आला. त्यामुळे जागतिक बाजारांमध्ये एकूणच नकारात्मक वातावरण तयार झाले आहे.
जागतिक घडामोडी आणि कच्च्या तेलाच्या वाढत्या किमतींच्या पार्श्वभूमीवर शेअर बाजारात अस्थिरता वाढताना दिसत आहे. अशा परिस्थितीत गुंतवणूकदारांनी संयम बाळगणे अत्यंत महत्त्वाचे असल्याचा सल्ला बाजारतज्ज्ञ अजय वाळिंबे यांनी दिला आहे. जय महाराष्ट्र न्यूजसोबत संवाद साधताना अजय वाळिंबे म्हणाले की, घाईगडबडीत किंवा पॅनिकमध्ये गुंतवणूक करू नये. बाजारात चढ-उतार होत असताना टप्प्याटप्प्याने गुंतवणूक केल्यास संभाव्य आर्थिक नुकसान टाळता येऊ शकते.
ते पुढे म्हणाले की, सध्याच्या परिस्थितीत गुंतवणूकदारांनी निवडक आणि मजबूत स्टॉक्समध्येच गुंतवणूक करावी. दीर्घकालीन दृष्टीकोन ठेवून गुंतवणूक करणे अधिक फायदेशीर ठरते. अजय वाळिंबे यांनी स्पष्टपणे सांगितले की, बाजार घसरला म्हणून SIP (Systematic Investment Plan) थांबवणे ही मोठी चूक ठरू शकते. उलट अशा काळात नियमित गुंतवणूक सुरू ठेवणे भविष्यात अधिक फायदा देऊ शकते. सध्या कच्च्या तेलाच्या किमती वाढत असल्याने त्याचा थेट परिणाम शेअर बाजारावर होत आहे. यामुळे पुढील काळात महागाई वाढण्याची शक्यताही त्यांनी व्यक्त केली.
दरम्यान, कच्च्या तेलाच्या किमतींमध्ये मोठी उसळी दिसून आली आहे. ब्रेंट वायदा व्यवहारात सुमारे 2.7 टक्क्यांची वाढ होऊन किंमत 115.55 डॉलर प्रति बॅरलवर पोहोचली. गेल्या काही आठवड्यांत तेलाच्या किमतींमध्ये जवळपास 59 टक्क्यांची वाढ झाली आहे. यामुळे महागाई वाढण्याची आणि अर्थव्यवस्थेवर ताण येण्याची भीती व्यक्त केली जात आहे.
Disclaimer: शेअर बाजारातील गुंतवणूक जोखमीची आहे. नियम व अटी काळजीपूर्वक वाचा. जय महाराष्ट्र न्यूज कोणत्याही नफ्या-तोट्यास जबाबदार नाही. गुंतवणुकीपूर्वी तज्ज्ञांचा सल्ला घ्या!
