मेरठच्या सौरभ हत्या प्रकरणातील (Saurabh Murder Case) आरोपी मुस्कान आणि तिचा प्रियकर सध्या जेलमध्ये बंद आहेत. जेलमध्ये साहिल आणि मुस्कान यांच्या नशेमुळे बिघडणाऱ्या तब्येतीच्या पार्श्वभूमीवर जेल प्रशासनाने त्यांची आरोग्य तपासणी केली. या दरम्यान मुस्कानची गर्भधारणा चाचणीही करण्यात आली. टेस्टमध्ये मुस्कान गर्भवती नसल्याचे स्पष्ट झाले. नशा, नैराश्य आणि रात्री झोप न लागल्यामुळे तिची तब्येत बिघडली आहे. सध्या डॉक्टर तिच्या आरोग्यावर लक्ष ठेवून आहेत.
जेल अधीक्षक वीरेश राज शर्मा यांनी सांगितले की, साहिल आणि मुस्कान दोघेही नशेच्या तीव्र आहारी आहेत. साहिल सुका म्हणजेच चरस आणि इतर नशा करतो, तर मुस्कान इंजेक्शनद्वारेही नशा करते. दोघेही मोठ्या प्रमाणात दारू सेवन करतात. जेलमध्ये नशा न मिळाल्यामुळे त्यांची तब्येत खालावली, त्यामुळे त्यांना व्यसनमुक्ती केंद्रात दाखल करण्यात आले आहे. तसेच, दोघांना एकमेकांपासून दूर ठेवण्यात आले आहे.
हेही वाचा: उपसभापती डॉ. नीलम गोऱ्हेंची कारवाईची सूचना
कायदेशीर मदतीची मागणी
रविवारी मुस्कान रडत आणि हताश अवस्थेत, तर साहिल घाबरलेला असताना जेल अधीक्षकांच्या समोर आले. त्यांनी सांगितले की, त्यांचे आई-वडील नाराज आहेत आणि कोणीही त्यांची मदत करत नाही. त्यामुळे त्यांना कायदेशीर मदत मिळावी. यावर जेल अधीक्षक वीरेश राज शर्मा यांनी तात्काळ त्यांचे अर्ज जिल्हा विधी सेवा प्राधिकरणाकडे पाठवले आहेत.
जेलच्या व्यसनमुक्ती केंद्रात हलवले
ज्या क्रूर पद्धतीने दोघांनी मिळून सौरभची निर्दयपणे हत्या केली, त्यामुळे जेलमधील इतर कैदीही संतप्त आहेत. हे लक्षात घेऊन जेल प्रशासनाने त्यांना सामान्य कैद्यांपासून दूर ठेवले आहे. दोघेही नशेच्या तीव्र आहारी आहेत. नशा मागण्याच्या त्यांच्या सवयीमुळे त्यांना सध्या जेलच्या व्यसनमुक्ती केंद्रात ठेवून उपचार सुरू आहेत.
