मुंबई : रस्त्याच्या मधोमध उभी केलेली ‘इनोव्हा’ कार…वाढदिवसाचे सेलिब्रेशन….आणि मग अचानक समोर आली एअरगन, ज्यामुळे परिसरात भीतीचे वातावरण निर्माण झाले. वाढदिवस साजरा करण्याच्या नावाखाली गोंधळ निर्माण केल्याप्रकरणी मुंबईतील बोरिवली येथे दहा जणांना अटक करण्यात आली आहे. बोरिवलीतील गोराई-2 भागात काही तरुणांनी रस्त्याच्या मधोमध वाढदिवसाची पार्टी केल्याची घटना समोर आली आहे.
या घटनेच्या दृश्यांमध्ये 5 ऑगस्ट रोजी मध्यरात्री साडेबाराच्या सुमारास गोराई-2 मधील ‘घरकुल को-ऑपरेटिव्ह हाउसिंग सोसायटी’जवळ ती काळ्या रंगाची ‘इनोव्हा’ कार दिसून येते. त्या कारच्या बॉनेटवर अनेक केक ठेवले होते. ज्याचा वाढदिवस साजरा केला जात होता, ती व्यक्ती ते केक कापत होती. त्याचे मित्र असावेत असे वाटणारे इतर लोक सार्वजनिक ठिकाणी पार्टी करताना गोंधळ घालत आणि मोठ्याने आरडाओरडा करताना दिसत होते. मोठ्या गर्दीमुळे त्या भागात वाहतुकीचा खोळंबा झाला आणि मोठ्या आवाजामुळे सार्वजनिक शांततेचा भंग झाला. तरीही, या गोष्टींचा उत्सवावर कोणताही परिणाम झाला नाही. उलट त्यांनी ‘एअरगन’ बाहेर काढली आणि त्यातील एका व्यक्तीने ती चालवली. ज्यामुळे छर्रे (पेलेट्स) बाहेर पडले. बोरिवली पोलिसांच्या माहितीनुसार, ती ‘बेबी एअरगन’ जतिन शर्मा याने आणली होती. ती विजेश उपाध्याय याने चालवली. छर्रे झाडण्याच्या या प्रकारामुळे परिसरात भीतीचे वातावरण निर्माण झाले. या कृत्यामुळे परिसरातील इतर लोकांच्या सुरक्षिततेला धोका निर्माण झाला, असे पोलिसांनी सांगितले. पोलिसांनी या प्रकरणात आकाश गुप्ता, जतिन शर्मा आणि विजेश उपाध्याय यांच्यासह 10 जणांना अटक केली आहे. भारतीय न्याय संहिता (BNS), मोटार वाहन कायदा, महाराष्ट्र पोलीस कायदा आणि फौजदारी कायदा सुधारणा कायदा (Criminal Law Amendment Act) यांच्या अंतर्गत गुन्हा दाखल करण्यात येत आहे. या प्रकरणाचा पुढील तपास सुरू आहे.
