वॉशिंग्टन डीसी : मायक्रोसॉफ्टचे सह-संस्थापक बिल गेट्स यांनी बुधवारी ‘हाऊस ओव्हरसाइट कमिटी’समोर जेफ्री एपस्टीन यांच्याशी असलेला त्यांचा संबंध हा “निर्णय घेण्यातील एक गंभीर चूक” असल्याचे सांगितले. या संबंधांबद्दल त्यांनी खेद व्यक्त केला, तसेच आपण एपस्टीनचे कोणतेही गुन्हेगारी कृत्य प्रत्यक्ष पाहिले नाही आणि त्या वेळी त्याच्या गुन्ह्यांच्या व्याप्तीबद्दल आपल्याला कोणतीही कल्पना नव्हती, असेही त्यांनी ठामपणे सांगितले. वॉशिंग्टनमध्ये समितीसमोर बोलताना गेट्स म्हणाले की, एपस्टीन प्रकरणाबाबत पारदर्शकता असावी या मताचे ते समर्थन करतात. या प्रकरणाशी संबंधित सर्व कागदपत्रे सार्वजनिक करण्याच्या बाजूने आहेत. “मी ‘एपस्टीन फाइल्स’ पूर्णपणे सार्वजनिक करण्याच्या बाजूने आहे. तसेच, मला मनापासून आशा आहे की, तुमच्या आणि या प्रकरणात पाठपुरावा करणाऱ्या इतरांच्या प्रयत्नांमुळे, एपस्टीनच्या गुन्ह्यांचे बळी ठरलेल्यांना त्यांना मिळायला हवा तो न्याय मिळेल,” असे गेट्स म्हणाले. एपस्टीनसोबतच्या आपल्या संबंधांवर थेट भाष्य करताना गेट्स म्हणाले, “एपस्टीन काही गुन्हेगारी कृत्यांमध्ये सातत्याने गुंतलेला आहे, असे मी कधीही पाहिले नाही किंवा मला तशी कोणतीही चाहूलही लागली नाही. मी त्याच्या बेटावर, रँचवर (फार्महाऊसवर) किंवा फ्लोरिडातील घरी कधीही गेलो नाही. मी कोणावरही अत्याचार केलेला नाही.”
गेट्स यांनी सांगितले की, 2011 मध्ये त्यांच्या व्यावसायिक आणि परोपकारी कार्याशी संबंधित असलेल्या व्यक्तींमार्फत त्यांची एपस्टीनशी ओळख झाली होती. गेट्स यांच्या म्हणण्यानुसार, एपस्टीनने दावा केला होता की, जागतिक आरोग्य उपक्रमांसाठी श्रीमंत देणगीदारांकडून अब्जावधी डॉलर्सचा निधी उभारण्यास तो मदत करू शकतो. “मला आठवतंय की एपस्टाईनला पूर्वी कायदेशीर अडचणींचा सामना करावा लागला होता, याची मला जाणीव होती. पण त्याने केलेल्या गुन्ह्यांची व्याप्ती मला पूर्णपणे समजली नव्हती. मी जी कसून चौकशी करायला हवी होती, ती न करताच मी ती ओळख स्वीकारली,” असे ते म्हणाले. गेट्स यांनी स्पष्ट केले की, सुरुवातीला त्यांच्यातील संवाद हा परोपकार आणि निधी उभारणीवर केंद्रित असलेल्या काही बैठकांपुरता मर्यादित होता. “या चर्चांमध्ये ‘डोनर-ॲडव्हाइज्ड फंड्स’ सारख्या संभाव्य देणगी संरचना ओळखण्यावर आणि ज्या व्यक्ती लक्षणीय योगदान देण्यास इच्छुक असल्याचा दावा त्याने केला होता. त्यांना कसे सामील करून घ्यायचे यावर लक्ष केंद्रित होते,” असे गेट्स म्हणाले. त्यांनी पुढे सांगितले की, त्यांनी एपस्टाईनला स्पष्ट केले होते की, ते “या कामात कधीही कोणतीही भूमिका बजावणार नाहीत किंवा कोणताही मोबदला घेणार नाहीत”.
"Meeting with Epstein grave error in judgement": Bill Gates tells US House Oversight Committee Read @ANI Story | https://t.co/5jbaaPt0bH#BillGates #US #Epstein pic.twitter.com/GQyoM4MwUa — ANI Digital (@ani_digital) June 10, 2026
गेट्स म्हणाले की, एपस्टाईन मोठे देणगीदार आणण्याच्या आपल्या आश्वासनांची पूर्तता करू शकत नाही, असा निष्कर्ष काढल्यानंतर त्यांनी 2014 मध्ये हे संबंध संपवले. “त्या वेळी, मला खात्री पटली की एपस्टीन आपली वचने कधीच पाळणार नाही. मी त्याला सांगितले की आपण यापुढे काहीही करणार नाही आणि त्याच्याशी संपर्क किंवा भेटीगाठी थांबवल्या,” असे सांगून ते पुढे म्हणाले, “दानधर्मासाठी कोणतेही माध्यम (संस्था किंवा निधी) कधीच निर्माण केले गेले नाही आणि कोणताही निधीही उभारला गेला नाही.” त्यांच्या खासगी कार्यालयातील एका कर्मचाऱ्याच्या जाण्याशी संबंधित वैयक्तिक प्रकरणात एपस्टीनच्या सहभागाबद्दलही त्यांनी भाष्य केले. ते म्हणाले, “या प्रकरणात एपस्टीनचा सहभाग असावा अशी मी मागणी केली नव्हती, तसेच तशी माझी इच्छा किंवा गरजही नव्हती.”
गेट्स यांच्या म्हणण्यानुसार, त्यांना नंतर समजले की एपस्टीनने त्यांच्या वैयक्तिक आयुष्याबद्दलची ज्यात विवाहबाह्य संबंधांचाही समावेश होता संवेदनशील माहिती मिळवली होती आणि त्या माहितीचा वापर करून त्यांच्यावर पुन्हा संपर्क साधण्यासाठी दबाव टाकण्याचा प्रयत्न केला होता. “त्यानंतरच मला समजले की एपस्टीनला माझ्या वैयक्तिक आयुष्याबद्दलची संवेदनशील माहिती मिळाली होती; यात माझ्या वैवाहिक आयुष्यात मी एकनिष्ठ राहिलो नव्हतो (विवाहबाह्य संबंध होते), या गोष्टीचाही समावेश होता,” असे गेट्स म्हणाले. त्यांनी पुढे सांगितले की, “माझ्या अनैतिक संबंधांबद्दलची माहिती आणि त्यासोबतच त्याने रचलेली अनेक खोटी कथने यांचा वापर करून माझ्यावर पुन्हा त्याच्याशी संबंध जोडण्यासाठी दबाव टाकण्याचा प्रयत्न एपस्टीन करत होता.” त्या संबंधावर विचार करताना, गेट्स यांनी कबूल केले की त्यांनी मुळातच एपस्टाईनला भेटायला नको होते. “मी मुळातच एपस्टाईनला भेटायला नको होते. आता मला जे माहीत आहे, त्यावरून मला समजते की, जरी त्याने वचन दिलेले नवीन देणगीदार दिले असते, तरीही त्याच्याशी संबंध ठेवणे योग्य ठरले नसते,” असे ते म्हणाले.
गेट्स यांनी पुढे असा युक्तिवाद केला की, एपस्टाईनने प्रतिष्ठित व्यक्तींसोबतच्या संबंधांमधून वैधता मिळवण्याचा प्रयत्न केला. “मला आता दिसते की, त्याने प्रतिष्ठित आणि शक्तिशाली लोकांशी असलेल्या संबंधांचा वापर करून, चौकशी टाळण्यासाठी आणि आपली प्रतिष्ठा पुन्हा मिळवण्याचा प्रयत्न करत, स्वतःभोवती वैधतेची प्रतिमा तयार करण्याचा प्रयत्न केला,” असे ते म्हणाले. आपल्या संबंधांमुळे एपस्टाईनला जी काही विश्वासार्हता मिळाली असेल, त्याबद्दल गेट्स यांनी खेद व्यक्त केला. “एपस्टाईनला भेटणे ही एक गंभीर चुकीची निवड होती आणि त्यामुळे हे काम धोक्यात आले,” असे ते म्हणाले. त्यांनी पुढे म्हटले, “मी एपस्टाईनसोबत घालवलेल्या वेळेमुळे त्याला जर काही विश्वासार्हता मिळाली असेल, तर मला त्याची मनापासून खंत आहे.” गेट्स यांनी खासदारांना सांगितले की, ते एपस्टाईनसोबतच्या त्यांच्या संबंधांबद्दलच्या प्रश्नांची उत्तरे देण्यास तयार आहेत आणि एपस्टाईनच्या गुन्ह्यांमधून वाचलेल्यांना अखेरीस न्याय मिळेल, अशी आशा त्यांनी पुन्हा व्यक्त केली.
