मुंबई: रिझर्व्ह बँक ऑफ इंडियाने (RBI) शुक्रवारी जाहीर केलेल्या आकडेवारीनुसार, 14 नोव्हेंबरला संपलेल्या आठवड्यात भारताचा परकीय चलनसाठा 5.54 अब्ज डॉलरने वाढून 692.58 अब्ज डॉलर झाला आहे. या वाढीचे प्रमुख कारण म्हणजे गोल्ड रिझर्व्हच्या मूल्यात झालेली मोठी वाढ, जी 5.34 अब्ज डॉलरने वाढून 106.86 अब्ज डॉलर इतकी झाली आहे. आरबीआयचे सोन्याचे मूल्य आंतरराष्ट्रीय बाजारातील किंमतींवर ठरते. त्यामुळे ही वाढ जागतिक पातळीवर सोन्याच्या किमतीत झालेल्या वाढीचे प्रतिक आहे.
ताज्या डेटानुसार, फॉरेक्स रिझर्व्हमधील सर्वात मोठा घटक असलेल्या Foreign Currency Assets मध्ये 152 दशलक्ष डॉलरची वाढ नोंदली गेली असून या मालमत्ता 562.29 अब्ज डॉलरवर पोहोचल्या आहेत. Special Drawing Rights (SDR) मधील मूल्यही 56 दशलक्ष डॉलरने वाढून 18.65 अब्ज डॉलर झाले आहे. त्याचप्रमाणे, IMF कडे असलेला रिझर्व्ह 8 दशलक्ष डॉलर वाढून 4.78 अब्ज डॉलरवर पोहोचला आहे. आरबीआयचे गव्हर्नर संजय मल्होत्रा यांनी भारताच्या फॉरेन एक्सचेंज साठ्याबद्दल समाधान व्यक्त केले.
हेही वाचा: Congress Honors Michelle Bachelet : भारतविरोधकाचा कॉंग्रेसकडून गौरव
त्यांनी सांगितले की, भारताचा फॉरेक्स साठा 11 महिन्यांपेक्षा जास्त आयात भागवण्यासाठी पुरेसा आहे, तसेच देशाच्या सुमारे 96 टक्के बाह्य कर्जाची गरजही या साठ्यातून पूर्ण होऊ शकते. त्यांच्या म्हणण्यानुसार, भारताचा एक्सटर्नल सेक्टर मजबूत असून देशाच्या आर्थिक गरजा सहज भागवल्या जातील. मार्केट तज्ज्ञांच्या मते, भारताच्या फॉरेक्स साठ्यातील सोन्याचा हिस्सा गेल्या दशकात जवळपास दुप्पट वाढला आहे. पूर्वी सोन्याचा हिस्सा 7 टक्क्यांपेक्षा कमी होता, तर आता तो 15 टक्क्यांपर्यंत पोहोचला आहे. ही वाढ आरबीआयच्या सातत्यपूर्ण सोने खरेदी धोरणाचे आणि जागतिक बुलियन मार्केटमधील किमतींच्या वाढीचे परिणाम आहे.
सोन्याच्या किमतींच्या दृष्टीने बघता, 2025 मध्ये सोन्याचे भाव तब्बल 65 टक्क्यांनी वाढले आहेत. मध्य पूर्वेतील भू-राजकीय तणाव, अमेरिकेच्या वाढीव टॅरिफची घोषणा आणि गुंतवणूकदारांचा सुरक्षित गुंतवणूक पर्यायाकडे कल या सर्व घटकांमुळे आंतरराष्ट्रीय बाजारात सोन्याचे दर चढत आहेत. ही वाढ भारताच्या फॉरेक्स साठ्यात थेट परावर्तित होत आहे.
