देशभरात दहशतवादविरोधी कारवाईत मोठे यश मिळाले असून, प्रतिबंधित दहशतवादी संघटनांशी संबंध असल्याच्या संशयावरून 12 जणांना अटक करण्यात आली आहे. या कारवाईत ‘अल-कायदा इन द इंडियन सबकॉन्टिनेंट’ (AQIS) आणि ‘इस्लामिक स्टेट ऑफ इराक अँड सिरिया’ (ISIS) यांसारख्या संघटनांशी संबंधित असल्याचा संशय व्यक्त करण्यात आला आहे. आंध्र प्रदेश आणि दिल्ली पोलिसांनी संयुक्तपणे बहुराज्यीय अभियान राबवून ही कारवाई केली.
या मोहिमेत आंध्र प्रदेश, बिहार, दिल्ली, पश्चिम बंगाल, राजस्थान, कर्नाटक, महाराष्ट्र आणि तेलंगणा या राज्यांतील संशयितांना ताब्यात घेण्यात आले. अटक करण्यात आलेल्यांमध्ये मोहम्मद रहमतुल्लाह शरीफ, मिर्झा सोहेल बेग, मोहम्मद दानिश, शादमान दिलखुश, अजमानुल्लाह खान, लकी अहमद, मीर आसिफ अली, जीशान, अब्दुल सलाम, शाहरुख खान, शियाज उर रहमान आणि सैदा बेगम यांचा समावेश आहे.
प्राथमिक तपासात समोर आले आहे की, या आरोपींनी एका गेमिंग ॲपच्या माध्यमातून विदेशी दहशतवादी संचालकांशी संपर्क साधला आणि नंतर त्यांच्याशी जोडले गेले. अधिकाऱ्यांच्या माहितीनुसार, त्यांचा “Benex Com” नावाच्या ISIS संबंधित गटाशी संबंध होता. सोशल मीडियावर त्यांनी भारताच्या राष्ट्रीय ध्वजाऐवजी ISISचा ध्वज दाखवणे, राष्ट्रध्वज जाळणे आणि भारताला इस्लामिक स्टेटमध्ये रूपांतरित करण्याची उघडपणे कृती केल्याचे समोर आले आहे.
हेही वाचा: CCTV New Rules: CCTV बसवण्यापूर्वी सावधान! सुरक्षिततेसाठी सरकारने लागू केले 'हे' कडक नियम
तपासात आणखी धक्कादायक बाब समोर आली असून, हे आरोपी पाकिस्तानमध्ये जाऊन प्रशिक्षण घेण्याच्या तयारीत होते. तसेच ते इतर युवकांना पाकिस्तान आणि अफगाणिस्तानमध्ये जाऊन प्रशिक्षण घेण्यासाठी प्रवृत्त करत होते. या कारवायांमुळे त्यांच्या नेटवर्कचा विस्तार अनेक राज्यांत झाल्याचे स्पष्ट झाले आहे.
विजयवाडा येथील तीन आरोपींनी “अल मलिक इस्लामिक यूथ” नावाचा गट तयार करून युवकांचे ब्रेनवॉश करण्याचा प्रयत्न केल्याचे समोर आले आहे. त्यांनी जिहादसाठी प्रेरणा देणारे व्हिडिओ तयार केले, स्वतःला ‘मुजाहिदीन’ म्हणून सादर केले आणि ओसामा बिन लादेन याच्या विचारसरणीचा प्रभाव दाखवण्याचा प्रयत्न केला.
या प्रकरणात काही आरोपी विविध व्यवसायांमध्ये कार्यरत होते. कोणी बाइक टॅक्सी चालक, कोणी लेझर मार्किंग तज्ञ, तर कोणी हॉटेलमध्ये काम करणारे कर्मचारी होते. त्यांनी ऑनलाइन प्लॅटफॉर्मच्या माध्यमातून कट्टरतावादी विचारांचा प्रसार केल्याचे तपासात उघड झाले आहे.
या संपूर्ण कारवाईमुळे देशात सक्रिय असलेल्या दहशतवादी नेटवर्कचा मोठा पर्दाफाश झाला असून, सुरक्षा यंत्रणांनी वेळीच कारवाई करून संभाव्य मोठा धोका टाळला आहे. पुढील तपास सुरू असून, या नेटवर्कमागील इतर दुव्यांचा शोध घेतला जात आहे.
