वॉशिंग्टन: अमेरिकेचे राष्ट्राध्यक्ष डोनाल्ड ट्रम्प यांच्या सुरक्षेत आणखी कडक उपाययोजना करण्याचा निर्णय अमेरिकेतील व्हाइट हाउस प्रशासनाने घेतला आहे. अलीकडेच झालेल्या गोळीबाराच्या घटनेनंतर या प्रकरणाकडे गांभीर्याने पाहत सुरक्षा व्यवस्थेचा सर्वंकष आढावा घेण्याचे ठरवण्यात आले आहे. ‘व्हाइट हाउस कॉरेस्पॉन्डेंट्स डिनर’दरम्यान झालेल्या या घटनेत ट्रम्प थोडक्यात बचावले होते.
या पार्श्वभूमीवर ‘यूएस सीक्रेट सर्व्हिस’ आणि अमेरिकेचे गृहसुरक्षा विभाग यांची उच्चस्तरीय बैठक आठवड्याच्या अखेरीस आयोजित करण्यात आली आहे. या बैठकीत सुरक्षा प्रोटोकॉल, आपत्कालीन उपाययोजना आणि भविष्यातील कार्यक्रमांसाठी आवश्यक बदल यावर सविस्तर चर्चा होणार आहे. वॉशिंग्टनमधील वॉशिंग्टन हिल्टन येथे हा कार्यक्रम आयोजित करण्यात आला होता.
या घटनेमुळे अमेरिकेतील राष्ट्रपती पदाच्या उत्तराधिकार प्रक्रियेवरही चर्चा सुरू झाली आहे. कार्यक्रमात कॅबिनेटमधील अनेक महत्त्वाचे सदस्य उपस्थित असल्याने सुरक्षा आणि आपत्कालीन व्यवस्थेबाबत प्रश्न उपस्थित झाले आहेत. आगामी काळात 4 जुलै 2026 रोजी अमेरिकेच्या स्वातंत्र्याच्या 250 व्या वर्धापनदिनानिमित्त अनेक सार्वजनिक कार्यक्रम होणार असल्याने ही सुरक्षा समीक्षा अधिक महत्त्वाची ठरत आहे.
व्हाइट हाउसच्या चीफ ऑफ स्टाफ सुसन वाइल्स यांनी ही बैठक बोलावली असून, त्यामध्ये राष्ट्रपती आणि उपराष्ट्रपती एकाच कार्यक्रमात उपस्थित राहावेत का, यावरही चर्चा होणार आहे. या डिनर कार्यक्रमात उपराष्ट्रपती जे. डी. वेंस, प्रतिनिधीगृहाचे अध्यक्ष माइक जॉन्सन, तसेच इतर वरिष्ठ मंत्री उपस्थित होते.
व्हाइट हाउसच्या प्रेस सचिव कॅरोलिन लेविट यांनी सांगितले की, कार्यक्रमापूर्वी ‘डिझिग्नेटेड सर्वायव्हर’ आणि उत्तराधिकार प्रक्रियेवर चर्चा झाली होती. मात्र, कॅबिनेटमधील काही सदस्य वैयक्तिक कारणांमुळे उपस्थित नसल्याने स्वतंत्र ‘डिझिग्नेटेड सर्वायव्हर’ नेमण्याची गरज भासली नाही.
दरम्यान, रिपब्लिकन पक्षाचे वरिष्ठ नेते मायकेल मॅक्कॉल यांनीही या प्रकरणावर प्रतिक्रिया देताना सांगितले की, अशा कार्यक्रमांमध्ये राष्ट्रपती आणि उपराष्ट्रपती दोघेही एकाच ठिकाणी उपस्थित राहणे योग्य आहे का, याचा पुनर्विचार करण्याची गरज आहे. अमेरिकेच्या संविधानानुसार आणि 1947 च्या राष्ट्रपती उत्तराधिकार कायद्यानुसार उपराष्ट्रपतीपासून विविध मंत्र्यांपर्यंत उत्तराधिकाराची साखळी निश्चित करण्यात आली आहे.
