मुंबई : मुंबई महापालिकेच्या एफ नॉर्थ वार्ड ऑफिससमोर दोन कंत्राटदारांमध्ये हाणामारी झाली आहे. तसेच दोघांनीही एकमेकांवर चाकूने हल्ला केला आहे. यामध्ये दोघेही गंभीर जखमी झाले असून दोघांवर रुग्णालयात उपचार सुरू आहेत. दोन्ही कंत्राटदारांकडे चाकू होते. एकाच्या पोटाला आणि दुसऱ्याच्या पायावर चाकुने वार झाल्याची पोलिसांनी माहिती दिली. एका टेंडरवरून दोघांमध्ये हाणामारी झाली असावी असा संशय पोलिसांची व्यक्त केला आहे. माटुंगा पोलिसांनी दोघांच्याही विरोधात हत्येचा प्रयत्न केलाचा गुन्हा दाखल केला असून तपास सुरू केला आहे. मुंबई महापालिका ही देशातील सर्वात श्रीमंत महानगरपालिका म्हणून ओळखली जाते. मुंबई महापालिकेकडून कंत्राट मिळवण्यासाठी कंत्राटदारांमध्ये चढा-ओढ असते. पण त्यातून अशा प्रकारे परस्परांवर जीवघेणा हल्ला होण्याची ही पहिलीच वेळ आहे. पोलीस तपासातून बऱ्याच गोष्टी समोर येतील.
