बंगळूर : रात्री उशिरा केलेल्या एका ऑनलाइन किराणा ऑर्डरमुळे घडलेली धक्कादायक घटना सध्या बंगळूरमध्ये चर्चेचा विषय ठरली आहे. लोकप्रिय ऑनलाइन ग्रोसरी प्लॅटफॉर्म ब्लिंकिट (Blinkit) च्या एका डिलिव्हरी एक्झिक्युटिव्हवर ग्राहकावर हल्ला करून त्याचे नाक मोडल्याचा गंभीर आरोप करण्यात आला आहे. ही घटना शहरातील कोरमंगळा परिसरात घडल्याचे समोर आले असून या प्रकरणामुळे ऑनलाइन डिलिव्हरी सेवांच्या सुरक्षिततेबाबत प्रश्न उपस्थित झाले आहेत.
तक्रारदार पॉल जे. विथायाथिल यांनी कोरमंगळा पोलीस ठाण्यात दिलेल्या माहितीनुसार, त्यांनी 7 मार्च रोजी मध्यरात्री सुमारे दोन वाजता ब्लिंकिट अॅपच्या माध्यमातून किराण्याचे सामान मागवले होते. ऑर्डर दिल्यानंतर काही वेळातच डिलिव्हरी एक्झिक्युटिव्ह परिसरात पोहोचला, मात्र तो चुकीच्या लोकेशनवर उभा असल्याचे लक्षात आले. ग्राहकाने त्याला योग्य पत्त्यावर म्हणजेच घराच्या दरवाजापर्यंत येण्यास सांगितल्यावर दोघांमध्ये वाद निर्माण झाल्याचा आरोप करण्यात आला आहे.
तक्रारीनुसार, सुरुवातीला केवळ शब्दांची देवाणघेवाण झाल्यासारखी वाटणारी ही परिस्थिती अचानक गंभीर वळणावर गेली. डिलिव्हरी कर्मचारी ग्राहकाच्या घरापर्यंत आला आणि अचानक त्याच्यावर हल्ला केल्याचा दावा करण्यात आला आहे. सांगितले जाते की, त्याने ग्राहकाच्या चेहऱ्यावर जोरदार ठोसा मारला, ज्यामुळे ग्राहकाच्या नाकाला दुखापत झाली आहे. एवढ्यावरच न थांबता, त्याने ग्राहकाने मागवलेले सामानही फेकून दिले आणि तेथून तत्काळ फरार झाला.
हेही वाचा: Mumbai Local Train: डहाणू लोकलला 13 वर्षे पूर्ण, पण प्रवाशांच्या नशिबी अजूनही 'मरणयातनाच'
या हल्ल्यानंतर जखमी ग्राहकाला तातडीने वैद्यकीय उपचार घ्यावे लागले. घटनेनंतर पोलिसांकडे तक्रार दाखल करण्यात आली. सुरुवातीला पोलिसांनी हा प्रकार एनसीआर (NCR, Non-Cognizable Report) म्हणून नोंदवला होता. मात्र प्रकरणाचे गांभीर्य लक्षात घेऊन नंतर त्याचे एफआयआर मध्ये रूपांतर करण्यात आले आहे.
पोलिसांनी या घटनेचा तपास सुरू केला असून आरोपी डिलिव्हरी एक्झिक्युटिव्हची ओळख पटवण्यासाठी ब्लिंकिट कंपनीकडून संबंधित कर्मचाऱ्याची माहिती मागवली आहे. उपलब्ध डिजिटल नोंदी, ऑर्डर तपशील आणि सीसीटीव्ही फुटेज यांच्या आधारे तपास पुढे नेला जात असल्याची माहिती समोर आली आहे.
दरम्यान, ही घटना उघड झाल्यानंतर शहरात ऑनलाइन डिलिव्हरी सेवांशी संबंधित सुरक्षेचा मुद्दा पुन्हा एकदा चर्चेत आला आहे. ग्राहकांच्या सुरक्षिततेबाबत कंपन्यांनी अधिक जबाबदारीने पावले उचलण्याची गरज असल्याची मागणीही व्यक्त केली जात आहे. पोलिसांनी सांगितले की तपास सुरू असून आरोपीचा शोध घेण्यासाठी पुढील कारवाई लवकरच केली जाईल.
