LPG Supply Update: देशभरात एलपीजी (LPG) गॅस पुरवठ्याबाबत निर्माण झालेल्या शंकांच्या पार्श्वभूमीवर, पेट्रोलियम आणि नैसर्गिक वायू मंत्रालयाने महत्त्वपूर्ण स्पष्टीकरण दिले आहे. मंत्रालयाच्या संयुक्त सचिव सुजाता शर्मा यांनी माहिती दिली की, सद्यस्थितीत देशातील कच्चे तेल आणि रिफायनरी कामकाजाची परिस्थिती पूर्णपणे सामान्य आहे. कोणत्याही इंधन पंपावर साठा संपल्याचे (Stockout) वृत्त नाही. विशेष म्हणजे, घरगुती वापराचा पीएनजी (PNG) आणि वाहनांसाठीचा सीएनजी (CNG) यांचा 100 टक्के पुरवठा सुनिश्चित करण्यात आला असून, त्यात कोणतीही कपात केलेली नाही. आंतरराष्ट्रीय बाजारातील आव्हाने पेलण्यासाठी भारत आता ऑस्ट्रेलिया आणि रशियाकडून एलएनजी (LNG) ची अतिरिक्त खरेदी करत आहे.
व्यावसायिक ग्राहकांना सीएनजीकडे वळण्याचे आवाहन आणि सवलती
नैसर्गिक वायूच्या बचतीसाठी सरकारने व्यावसायिक एलपीजी ग्राहकांना जिथे शक्य असेल तिथे सीएनजीचा वापर करण्याचे आवाहन केले आहे. या बदलाला प्रोत्साहन देण्यासाठी विविध कंपन्यांनी सवलती (Incentives) जाहीर केल्या आहेत. ज्या राज्यांनी पीएनजी नेटवर्क विस्तारण्यासाठी सहकार्य केले आहे, त्यांना व्यावसायिक एलपीजीचा अतिरिक्त 10 टक्के कोटा देण्याचे आश्वासन केंद्र सरकारने दिले आहे. या उपक्रमांमुळे गेल्या 2 आठवड्यांत सुमारे 1,25,000 नवीन गॅस जोडण्या (Connections) देण्यात आल्या आहेत, तर केवळ 3 दिवसांत 5,600 हून अधिक ग्राहकांनी यशस्वीरित्या पीएनजीकडे स्थलांतर केले आहे.
एलपीजी बुकिंग आणि घरपोच डिलिव्हरीची सद्यस्थिती
मंत्रालयाने नमूद केले की, सध्या कोणत्याही वितरक केंद्रावर गॅसच्या तुटवड्याची तक्रार नाही. ऑनलाइन बुकिंगचे प्रमाण वाढून आता 94 टक्क्यांवर पोहोचले आहे, तर 83 टक्के सिलिंडरची डिलिव्हरी आता ‘डिलिव्हरी ऑथेंटिकेशन कोड’ (DAC) द्वारे सुरक्षितपणे केली जात आहे. घबराटीपोटी (Panic Booking) केल्या जाणाऱ्या बुकिंगचे प्रमाण आता कमी होत असून, कालच्या दिवशी सुमारे 57,000 रिफिल बुकिंग प्राप्त झाली आहेत. सिलिंडरची डिलिव्हरी प्रक्रिया अत्यंत सुरळीत असून ग्राहकांनी अफवांवर विश्वास ठेवू नये, असे आवाहन सरकारने केले आहे.
#WATCH | Delhi: Sujata Sharma, Joint Secretary (Marketing & Oil Refinery), Ministry of Petroleum & Natural Gas, says, "The crude oil situation and refinery operations are normal. No dry-outs have been reported at retail pumps. All retail outlets are operating normally. Domestic… pic.twitter.com/jNSmoYTdrC — ANI (@ANI) March 19, 2026
राज्यस्तरावरील नियोजन आणि रॉकेल वाटप
एलपीजीच्या समान वाटपासाठी सुमारे 17 राज्य सरकारांनी व्यावसायिक एलपीजीबाबत तर 15 राज्यांनी अतिरिक्त रॉकेल वाटपाबाबत आदेश जारी केले आहेत. आता सर्व राज्ये आणि केंद्रशासित प्रदेशांना त्यांच्या गरजेनुसार व्यावसायिक एलपीजीचा पुरवठा वाटप करण्यात आला आहे. युद्धासारख्या जागतिक संकटामुळे पुरवठ्यावर परिणाम होऊ नये, यासाठी केंद्र सरकार युद्धपातळीवर पर्यायी मार्ग आणि नवीन पुरवठादारांशी संपर्क साधत आहे, जेणेकरून भारतीय ग्राहकांना कोणताही त्रास होणार नाही.
