ICC T20 World Cup 2026: अमेरिकेने इराणवर केलेल्या भीषण हल्ल्यामुळे मध्यपूर्वेतील परिस्थिती चिघळली असून, याचा थेट फटका भारत आणि श्रीलंकेत सुरू असलेल्या ICC पुरुष टी-२० विश्वचषक 2026 ला बसला आहे. स्पर्धेत सहभागी असलेले खेळाडू, अधिकारी आणि प्रसारकांचे परतीचे प्रवास धोक्यात आले आहेत. या पार्श्वभूमीवर, आंतरराष्ट्रीय क्रिकेट परिषद (ICC) परिस्थितीवर बारकाईने लक्ष ठेवून असून, सर्व भागधारकांचा प्रवास, रसद आणि सुरक्षा सुनिश्चित करण्यासाठी व्यापक 'आकस्मिक योजना' (Contingency Plans) राबवत असल्याचे शनिवारी स्पष्ट केले आहे.
विमान कंपन्यांची उड्डाणे स्थगित; हवाई मार्ग विस्कळीत
अमेरिका आणि इस्रायलने इराणवर केलेल्या आक्रमणामुळे पश्चिम आशियातील हवाई वाहतूक पूर्णपणे कोलमडली आहे. संयुक्त अरब अमिराती (UAE) आणि इस्रायलने शनिवारी आपले हवाई क्षेत्र (Airspace) बंद केले आहे. आंतरराष्ट्रीय प्रवासाचे मुख्य केंद्र असलेल्या दुबईतील 'एमिरेट्स' आणि 'एतिहाद' यांसारख्या मोठ्या विमान कंपन्यांनी आपली लांब पल्ल्याची उड्डाणे थांबवली आहेत. कतार एअरवेजनेही दोहा येथून चालणारी आपली सर्व सेवा तात्पुरती स्थगित केली आहे. इस्रायलच्या बेन गुरियन विमानतळावर येणारी विमाने इतरत्र वळवण्यात आली असून प्रवाशांना माघारी पाठवण्यात आले आहे.
अनेक देशांमध्ये 'नो-फ्लाय झोन'; प्रवासाचा वेळ वाढणार
UAE चे हवाई क्षेत्र बंद झाल्यामुळे दुबई आंतरराष्ट्रीय विमानतळावरून होणाऱ्या वाहतुकीवर मोठा परिणाम झाला आहे. डच विमान कंपनी KLM ने रविवारपासून तेल अवीवची सेवा बंद करण्याची घोषणा केली आहे. 'व्हर्जिन अटलांटिक'ने लंडन ते दुबई ही उड्डाणे रद्द केली असून, इराकच्या हवाई क्षेत्राचा वापर टाळण्याचा निर्णय घेतला आहे. यामुळे भारत, मालदीव आणि दुबईला जाणाऱ्या विमानांना आता लांबचा वळसा घेऊन प्रवास करावा लागणार असून, प्रवासाच्या वेळेत मोठी वाढ होणार आहे. व्हर्जिन अटलांटिकने स्पष्ट केले आहे की, आपत्कालीन मार्ग बदलण्यासाठी सर्व विमानांमध्ये अतिरिक्त इंधन ठेवले जात आहे.
अनेक उड्डाणे रद्द
तुर्की एअरलाइन्सने दिलेल्या माहितीनुसार, लेबनॉन, सीरिया, इराक, इराण आणि जॉर्डनला जाणारी उड्डाणे सोमवारपर्यंत स्थगित राहतील. तसेच कतार, कुवेत, बहरीन, UAE आणि ओमानला जाणारी उड्डाणे शनिवारीही बंद ठेवण्यात आली आहेत. युद्धाची तीव्रता पाहता आगामी काळात आणखी उड्डाणे रद्द होण्याची शक्यता नाकारता येत नाही. ICC सध्या विविध देशांच्या सरकारांशी आणि विमान कंपन्यांशी संपर्कात असून, विश्वचषक संपल्यानंतर खेळाडूंना सुरक्षितपणे त्यांच्या मायदेशी पोहोचवण्यासाठी पर्यायी मार्गांचा शोध घेत आहे.
