Hockey World Cup 2026: हॉकी विश्वचषक स्पर्धेत भारतीय संघाने आपली विजयी लय कायम राखत पारंपरिक प्रतिस्पर्धी पाकिस्तानचा 5-3 अशा फरकाने पराभव केला. 'पूल-डी' मधील हा सामना भारतासाठी अत्यंत महत्त्वाचा होता. इंग्लंडविरुद्धच्या पराभवानंतर भारतीय खेळाडूंवर विजयाचे दडपण होते; मात्र कर्णधार हरमनप्रीत सिंग आणि अभिषेक यांच्या चमकदार कामगिरीच्या जोरावर भारताने सुरुवातीपासूनच सामन्यावर पकड मजबूत केली. या विजयासह भारताने स्पर्धेतील अंतिम 8 संघांमध्ये आपले स्थान निश्चित केले आहे.
पहिल्याच सत्रात भारताची 2-0 ने भक्कम आघाडी
सामन्याच्या सुरुवातीपासूनच भारतीय खेळाडूंनी आक्रमक चाली रचल्या. खेळाच्या 4 थ्या मिनिटाला मिळालेल्या पेनल्टी कॉर्नरचा पुरेपूर फायदा उठवत कर्णधार हरमनप्रीत सिंगने पहिला गोल नोंदवला. यानंतर 10 व्या मिनिटाला अभिषेकने अप्रतिम 'फील्ड गोल' करत भारताची आघाडी 2-0 अशी वाढवली. पहिल्या 15 मिनिटांच्या खेळात भारतीय मध्यफळीने पाकिस्तानच्या बचावफळीला कोणतीही संधी दिली नाही.
दुसऱ्या सत्रातील थरार अन् मध्यांतरापर्यंत 4-2 अशी स्थिती
दुसरे सत्र दोन्ही संघांसाठी अत्यंत चुरशीचे ठरले. 21 व्या मिनिटाला हरमनप्रीतने स्वतःचा दुसरा गोल करत धावसंख्या 3-0 केली. त्यानंतर लगेचच 22 व्या मिनिटाला पाकिस्तानच्या हनान शाहिदने गोल करून संघाचे खाते उघडले. 24 व्या मिनिटाला अभिषेकने पुन्हा एकदा वैयक्तिक दुसरा गोल डागून भारताला 4-1 अशी भक्कम स्थिती मिळवून दिली. मात्र 25 व्या मिनिटाला पाकिस्तानच्या सुफियान खानने पेनल्टी कॉर्नरद्वारे गोल केल्यामुळे मध्यांतरापर्यंत (Half-time) धावफलक 4-2 असा राहिला.
हेही वाचा – India Win 1st test vs Sri Lanka: गॉल कसोटीत भारताचा श्रीलंकेवर 165 धावांनी दणदणीत विजय, मालिकेत 1-0 ची आघाडी
हार्दिकचा गोल अन् पाकिस्तानचे आव्हान संपुष्टात
सामन्याच्या तिसऱ्या सत्रात म्हणजेच 35 व्या मिनिटाला हार्दिक सिंगने पेनल्टी कॉर्नरवर सुरेख गोल नोंदवत भारताची आघाडी 5-2 अशी मजबूत केली. चौथ्या सत्रात 46 व्या मिनिटाला पाकिस्तानच्या हनान शाहिदने आणखी एक गोल केला, परंतु तोपर्यंत सामना पाकिस्तानच्या हातातून निसटला होता. भारताने 5-3 असा दणदणीत विजय मिळवत बाद फेरीत धडक मारली, तर सलग पराभवांमुळे पाकिस्तानचे स्पर्धेतील आव्हान संपुष्टात आले.
