India vs South Africa: रायपूरच्या मैदानावर भारतीय क्रिकेट चाहत्यांसाठी रोमांचक क्षणांची एक मेजवानीच रंगली. तीन सामन्यांच्या मालिकेतील दुसरा सामना जिंकण्यासाठी टीम इंडियाने जिगर लावून खेळ करत 359 धावांचा डोंगर उभा केला. विराट कोहली आणि ऋतुराज गायकवाड यांनी साजऱ्या केलेल्या दोन झळाळत्या शतकार्थींनी भारताच्या विजयाची आशा आणखी उंचावली होती. मात्र अखेरच्या क्षणी दक्षिण आफ्रिकेने धडाकेबाज प्रतिसाद देत 4 विकेट्सने सामना जिंकत सामन्यात परतफेड केली.
भारतीय डावाची सुरुवात अपेक्षेप्रमाणे झाली नाही. रोहित शर्मा (14) आणि यशस्वी जैस्वाल (22) बाद झाल्यावर संघ दबावात आला होता. पण त्यानंतर कोहली आणि ऋतुराज या दोघांनी तिसऱ्या विकेटसाठी जवळपास 200 धावांची मोठी भागीदारी साकारत दक्षिण आफ्रिकन गोलंदाजांना घाम फोडला. ऋतुराजने 77 चेंडूंमध्ये आपल्या ODI कारकिर्दीतील पहिले शतक गाठले, तर विराटने 90 बॉलमध्ये शानदार शतक ठोकत पुन्हा एकदा ‘किंग’ची छाप उमटवली. शेवटच्या टप्प्यात कर्णधार के.एल. राहुल (66*) आणि रवींद्र जडेजा (24*) यांनी जलद धावा काढत भारताला 358 धावांवर नेले एक भक्कम आणि लढाऊ स्कोर. परंतु… क्रिकेट म्हणजे अनिश्चिततेचा खेळ!
Proteas च्या फलंदाजीला भारतीय गोलंदाजांनी सुरुवातीला आवर घालण्याचा प्रयत्न केला. पण एडन मार्करम, मॅथ्यू ब्रिट्झके आणि डेवाल्ड ब्रेव्हिस यांनी आक्रमक फटकेबाजी करत सामन्याचे समीकरण बदलले. भारतीय गोलंदाजांनी चांगल्या लयीत चेंडू टाकले होते, काही उत्तम विकेट्सही मिळवल्या… पण कधी कधी विरोधकही उत्कृष्ट खेळ करतात आणि त्यादिवशी दक्षिण आफ्रिकेने तेच दाखवून दिलं.
अंतिम षटकांत केशव महाराज आणि कोर्बिन बॉश यांनी अचूक भागीदारी करत Proteas ला 49.2 षटकांत विजय मिळवून दिला.अर्शदीप सिंह आणि प्रसिध कृष्णा यांनी प्रत्येकी दोन विकेट्स घेत भारतीय लढाई अखेरपर्यंत कायम ठेवली हा लढवय्या स्वभावच टीम इंडियाचं खरं वैशिष्ट्य आहे.
