Pravin Darekar: मुख्यमंत्री देवेंद्र फडणवीस यांनी राष्ट्रीय राजकारणात जाऊन देशाचे नेतृत्व करावे, जेणेकरून महाराष्ट्रात उपमुख्यमंत्री एकनाथ शिंदे यांच्याशिवाय दुसरा पर्याय उरणार नाही, असे विधान शिवसेना शिंदे गटाचे नेते बच्चू कडू यांनी केले होते. या विधानावर भारतीय जनता पक्षाचे नेते प्रवीण दरेकर यांनी तीव्र आक्षेप घेत बच्चू कडू यांना जोरदार सुनावले आहे. महायुती म्हणून देवेंद्र फडणवीस, एकनाथ शिंदे आणि सुनेत्रा पवार हे सर्वजण मिळून राज्याला पुढे नेण्याचे काम करत असताना, केवळ प्रसिद्धीच्या हव्यासापोटी आणि स्वतःच्या नेत्याला खूश करण्यासाठी असे वादग्रस्त वक्तव्य करणे चुकीचे असल्याचे दरेकर म्हणाले. देवेंद्र फडणवीस यांनी कुठे राहावे आणि काय करावे, हे ठरवण्याची बच्चू कडू यांची ना उंची आहे ना अधिकार, अशा कडक शब्दांत त्यांनी कडू यांचा समाचार घेतला.
महायुतीतील नेत्यांनी मर्यादेचे भान ठेवावे
एकनाथ शिंदे यांच्या मुख्यमंत्रीपदाबाबत बोलताना प्रवीण दरेकर यांनी स्पष्ट केले की, आपल्या पक्षाच्या नेत्याबद्दल कार्यकर्त्यांनी किंवा लोकप्रतिनिधींनी अपेक्षा व्यक्त करणे यात काहीच गैर नाही. मात्र, महायुतीचे नेतृत्व कोण करणार किंवा कोणी कुठे जावे, हा सर्वस्वी भाजपचे केंद्रीय शीर्षस्थ नेतृत्व, एकनाथ शिंदे आणि सुनेत्रा पवार यांच्यातील अंतर्गत समन्वयाचा विषय आहे. यामध्ये इतर घटकांनी उगाचच नाक खुपसून मूर्खपणाची विधाने करू नयेत. महायुतीमधील घटक पक्ष म्हणून प्रत्येकाने आपल्या मर्यादेचे आणि क्षमतेचे भान ठेवले पाहिजे, अशी मित्रत्वाची तंबीही दरेकरांनी बच्चू कडू यांना दिली आहे.
भाजप हा शिस्तीचा पक्ष; संजय राऊतांच्या दाखल्याची गरज नाही
देवेंद्र फडणवीस यांच्या दिल्ली दौऱ्याबाबत विरोधकांकडून आणि विशेषतः संजय राऊत यांच्याकडून वर्तवल्या जाणाऱ्या भाकितांवरही प्रवीण दरेकरांनी कडक टीका केली. भाजपला स्वतःची एक मजबूत आणि शिस्तबद्ध यंत्रणा असून पक्षाचे निर्णय कोणाच्या बेताल वक्तव्यांवरून ठरत नाहीत, असे त्यांनी स्पष्ट केले. संजय राऊत यांनी भाजपच्या अंतर्गत बाबींवर बोलण्यापेक्षा स्वतःच्या पक्षात कोण काय बडबडत आहे याकडे लक्ष द्यावे, असा टोला त्यांनी लगावला. भाजपचे केंद्रीय नेतृत्व आणि देवेंद्र फडणवीस यांच्यात नेहमीच उत्तम समन्वय राहिला असून, भविष्यातील सर्व निर्णय पक्षाच्या धोरणानुसारच घेतले जातील, असे सांगत दरेकरांनी या वादावर पडदा टाकण्याचा प्रयत्न केला.
