Sanjay Raut: अयोध्येतील राम मंदिरात झालेल्या कथित अफरातफर आणि चोरीच्या प्रकरणावरून आता राजकीय वातावरण चांगलेच तापले आहे. या संवेदनशील मुद्द्यावर राष्ट्रीय स्वयंसेवक संघाने (RSS) जनतेला संयम व शांतता राखण्याचे आवाहन केले होते. मात्र, संघाच्या या भूमिकेवर शिवसेना (उद्धव बाळासाहेब ठाकरे) पक्षाचे खासदार संजय राऊत यांनी अत्यंत तीव्र शब्दांत आक्षेप घेतला आहे. प्रसारमाध्यमांशी संवाद साधताना त्यांनी थेट सवाल केला की, जर 1992 च्या आंदोलनादरम्यान कारसेवकांनी संयम आणि कायदेशीर मार्गांची वाट पाहिली असती, तर आज अयोध्येत भव्य राम मंदिर उभे राहू शकले असते का?
'बलिदान आमचे, मग आता शांततेचा सल्ला का?'
संघाची सध्याची भूमिका ही मंदिरातील घोटाळेबाजांना आणि चोरांना पाठीशी घालणारी असल्याचा गंभीर आरोप संजय राऊत यांनी केला. राम मंदिराचा इतिहास आठवून देताना ते म्हणाले की, त्या काळात कारसेवकांच्या संयमाचा बांध तुटला म्हणूनच त्यांनी प्राणांची आहुती देऊन बाबरीचा ढाचा उद्ध्वस्त केला. या संपूर्ण संघर्षात जवळपास 1,000 कारसेवकांना आपले प्राण गमवावे लागले होते. त्यानंतर मुंबईत झालेल्या दंगलीत 350 हून अधिक शिवसैनिक आणि हिंदू बांधवांनी बलिदान दिले, ज्यामध्ये भाजप किंवा संघ कुठेही आघाडीवर नव्हता. त्याग आणि रक्त आम्ही सांडले असताना, आता सर्व काही सुरळीत झाल्यावर संघाने संयमाचे डोस पाजू नयेत, असा घणाघात त्यांनी केला.
'हा दरोडा आहे, मंदिर ट्रस्ट तात्काळ बरखास्त करा'
राम मंदिरातील कथित चोरीवर बोलताना खासदार राऊतांनी हा प्रकार किरकोळ नसून थेट दरोडा असल्याचा दावा केला. कायद्यानुसार जेव्हा एखाद्या गुन्ह्यात 5 पेक्षा जास्त लोकांचा सहभाग असतो, तेव्हा तो दरोडा ठरतो. या प्रकरणात तर अनेकांचा हात असल्याने हा राम मंदिरावर पडलेला मोठा दरोडा आहे आणि यासाठी मंदिराचे ट्रस्टी पूर्णपणे जबाबदार आहेत. त्यामुळे निष्क्रीय ठरलेला हा राम मंदिर ट्रस्ट तात्काळ बरखास्त करण्यात यावा, अशी मागणी त्यांनी केली. हा ट्रस्ट कोणा एका विशिष्ट पक्षाचा नसून सर्व रामभक्तांचा असायला हवा, असेही ते म्हणाले.
हेही वाचा – Raj Thackeray: 'सत्तेचा माज आला आहे', अमित साटम यांच्या व्हिडीओवर राज ठाकरेंचा संताप, थेट मुख्यमंत्र्यांनाच…
भाजपला वाचवण्यासाठी संघाची ढाल; आंदोलनाचा इशारा
ठाकरे गटाने या घोटाळ्याविरोधात आंदोलनाची घोषणा केल्यानंतरच संघाने आपली भूमिका जाहीर केल्याचा दावा राऊतांनी केला. भाजप सरकारची डागाळलेली प्रतिमा वाचवण्यासाठी संघ स्वतःची ढाल पुढे करत असल्याचा टोला त्यांनी लगावला. संघाने राजकीय पक्षाची बाजू न घेता सामान्य रामभक्तांच्या बाजूने उभे राहिले पाहिजे. या अन्यायाविरोधात मुंबईत उद्यापासून सुरू होणाऱ्या आंदोलनाची ठिणगी आता संपूर्ण महाराष्ट्र आणि देशाच्या कानाकोपऱ्यात पसरल्याशिवाय राहणार नाही, असा इशारा शेवटी संजय राऊत यांनी दिला.
