Rahul Deshpande Divorce: सुप्रसिद्ध गायक राहुल देशपांडे यांनी काही महिन्यांपूर्वी त्यांच्या वैयक्तिक आयुष्याबाबत एक मोठा निर्णय जाहीर केला होता. लग्नाच्या तब्बल 17 वर्षांनंतर त्यांनी आणि त्यांच्या पत्नीने परस्पर संमतीने विभक्त होण्याचा निर्णय घेतला. या घटनेने चाहत्यांमध्ये आश्चर्याची लाट उसळली होती. विशेष म्हणजे, राहुल यांनी ही माहिती सोशल मीडियावर शेअर करत सर्वांना सांगितली होती. आता नुकत्याच दिलेल्या एका मुलाखतीत त्यांनी या निर्णयामागचं कारण स्पष्ट केलं आहे.
राहुल देशपांडे यांनी ‘मित्र म्हणे’ या पॉडकास्टमध्ये आपल्या वैयक्तिक आयुष्याबाबत मोकळेपणाने संवाद साधला. त्यांना विचारण्यात आलं की, घटस्फोट ही वैयक्तिक बाब असताना ती सोशल मीडियावर जाहीर करण्याची गरज का वाटली? यावर उत्तर देताना राहुल म्हणाले की, एक कलाकार म्हणून आणि माणूस म्हणून ते नेहमी प्रामाणिक राहण्याचा प्रयत्न करतात. त्यांच्या आयुष्यातील अनेक क्षण त्यांनी चाहत्यांसोबत शेअर केले आहेत, त्यामुळे हा बदलही सांगणं त्यांना योग्य वाटलं.
त्यांनी पुढे सांगितलं की, 'आमच्या आयुष्यातील अनेक आनंदाचे क्षण सोशल मीडियावर शेअर झाले होते. त्यामुळे हा एक महत्त्वाचा टप्पा संपला आहे, हेही लोकांना सांगणं गरजेचं वाटलं. यामागे कोणताही वेगळा हेतू नव्हता.' राहुल यांच्या मते, चाहत्यांशी प्रामाणिक राहणं ही त्यांची जबाबदारी आहे.
घटस्फोटानंतरही त्यांच्या आणि त्यांच्या माजी पत्नीमधील नातं सौहार्दपूर्ण असल्याचं त्यांनी स्पष्ट केलं. दोघेही आपल्या मुलीच्या संगोपनासाठी एकत्र जबाबदारी पार पाडत आहेत. 'आमचं वैयक्तिक नातं बदललं असलं तरी आई-वडील म्हणून आमची जबाबदारी कायम आहे,' असंही त्यांनी नमूद केलं.
राहुल यांनी त्यांच्या सोशल मीडिया पोस्टमध्येही याबाबत स्पष्ट भूमिका मांडली होती. त्यांनी सांगितलं होतं की, या बदलाशी जुळवून घेण्यासाठी त्यांनी थोडा वेळ घेतला आणि त्यानंतरच ही माहिती सार्वजनिक केली. त्यांच्या मुलीच्या हिताचा विचार करत त्यांनी हा निर्णय घेतल्याचंही त्यांनी अधोरेखित केलं.
दरम्यान, राहुल देशपांडे हे संगीत क्षेत्रातील एक मान्यवर नाव असून त्यांच्या गायनाला प्रेक्षकांकडून प्रचंड प्रतिसाद मिळतो. वैयक्तिक आयुष्यातील या बदलानंतरही त्यांच्या कामावर त्याचा परिणाम होणार नाही, अशी अपेक्षा त्यांच्या चाहत्यांकडून व्यक्त केली जात आहे.
