मुंबई : उपमुख्यमंत्री सुनेत्रा पवार यांच्या रिक्त झालेल्या राज्यसभा जागेसाठी अखेर राष्ट्रवादी काँग्रेस पक्षाने आपल्या उमेदवाराची घोषणा केली आहे. गेल्या काही दिवसांपासून या जागेसाठी अनेक नावांची चर्चा सुरू असताना पक्षाने विदर्भातील ज्येष्ठ नेते राजेंद्र जैन यांच्यावर विश्वास दाखवत त्यांना उमेदवारी जाहीर केली आहे. विशेष म्हणजे, मंत्री छगन भुजबळ यांचे नाव या जागेसाठी सर्वाधिक चर्चेत होते. त्यामुळे पक्षाच्या या निर्णयाची राज्याच्या राजकीय वर्तुळात मोठी चर्चा रंगली आहे.
राज्यसभा निवडणुकीसाठी उमेदवारी अर्ज भरण्याची मुदत जवळ येत असताना राष्ट्रवादी काँग्रेसच्या कोअर कमिटीची बैठक मुंबईतील ‘देवगिरी’ या शासकीय निवासस्थानी पार पडली. या बैठकीत विविध नावांवर चर्चा झाल्यानंतर अखेर राजेंद्र जैन यांच्या नावावर शिक्कामोर्तब करण्यात आले. बैठकीनंतर पक्षाचे प्रदेशाध्यक्ष सुनील तटकरे यांनी पत्रकार परिषदेत या निर्णयाची अधिकृत घोषणा केली.
राजेंद्र जैन हे विदर्भातील अनुभवी आणि संघटनात्मक कामासाठी ओळखले जाणारे नेते आहेत. त्यांनी भंडारा-गोंदिया स्थानिक स्वराज्य संस्था मतदारसंघातून विधान परिषदेचे प्रतिनिधित्व केले आहे. याशिवाय जिल्हा मध्यवर्ती बँक, सहकारी संस्था आणि विविध सामाजिक संघटनांमध्ये त्यांनी महत्त्वाची जबाबदारी सांभाळली आहे. विदर्भातील नेतृत्वाला संधी देण्याच्या उद्देशाने पक्षाने हा निर्णय घेतल्याचे सांगितले जात आहे.
दरम्यान, राज्यसभा जागेसाठी छगन भुजबळ यांचे नाव जवळपास निश्चित मानले जात होते. गेल्या काही दिवसांत त्यांच्या उमेदवारीबाबत राजकीय चर्चांना उधाण आले होते. मात्र अखेर पक्षाने वेगळा निर्णय घेतल्याने अनेकांच्या भुवया उंचावल्या आहेत. भुजबळ यांना डावलण्यात आले का, अशी चर्चा सुरू झाली असली तरी पक्षाने मात्र अशा सर्व चर्चांना पूर्णविराम देण्याचा प्रयत्न केला आहे.
प्रदेशाध्यक्ष सुनील तटकरे यांनी यावर प्रतिक्रिया देताना छगन भुजबळ हे पक्षाचे ज्येष्ठ आणि संस्थापक नेत्यांपैकी एक असल्याचे सांगितले. पक्षाच्या निर्णय प्रक्रियेत त्यांचे योगदान कायम राहिले असून त्यांचा सन्मान राखला जाईल, असेही त्यांनी स्पष्ट केले. तसेच भुजबळ नाराज नसल्याचा दावा करत राष्ट्रवादी काँग्रेस एकसंघ असल्याचे त्यांनी सांगितले.
उमेदवारी जाहीर झाल्यानंतर राजेंद्र जैन यांनी पक्ष नेतृत्वाचे आभार मानले. पक्षाने दाखवलेल्या विश्वासाला न्याय देण्यासाठी आपण पूर्ण ताकदीने काम करू, अशी प्रतिक्रिया त्यांनी दिली. अजित पवार यांच्या नेतृत्वाखाली पक्षाची भूमिका अधिक प्रभावीपणे संसदेत मांडण्याचा प्रयत्न करणार असल्याचेही त्यांनी सांगितले.
राज्यसभेच्या या उमेदवारीमुळे राष्ट्रवादी काँग्रेसने विदर्भावर भर दिल्याचे स्पष्ट झाले आहे. आगामी काळात या निर्णयाचे राजकीय परिणाम काय होतात, याकडे राज्याच्या राजकीय वर्तुळाचे लक्ष लागले आहे.
