Manikrao Kokate: विधानभवनात रमी खेळल्याच्या वादामुळे चर्चेत आलेले माणिकराव कोकाटे यांच्याकडून अखेर कृषीखाते काढून घेण्यात आलं आहे. सरकारने त्यांच्या खात्याचा फेरवाटप करत त्यांना क्रीडा व युवक कल्याण मंत्रालय दिलं आहे. तर आता दत्तात्रय भरणे यांच्यावर कृषी खात्याची धुरा सोपवण्यात आली आहे.
माणिकराव कोकाटे हे गेल्या काही दिवसांपासून सतत वादाच्या भोवऱ्यात होते. अधिवेशन सुरू असताना ते रमी खेळत असल्याचा व्हिडिओ सोशल मीडियावर झळकला आणि विरोधकांनी याचा जोरदार धसका घेतला. कोकाटेंनी हा आरोप फेटाळण्याचा प्रयत्न केला असला, तरी जनमत आणि राजकीय दडपणामुळे सरकारला एक पाऊल मागे घ्यावं लागलं.
सकाळपासूनच उपमुख्यमंत्री अजित पवार आणि मुख्यमंत्री देवेंद्र फडणवीस यांच्यात खातेबदलासंदर्भात बैठक सुरू होती. यानंतर महायुतीने आपली ‘डॅमेज कंट्रोल’ रणनीती अमलात आणली आणि कोकाटेंचा विभाग बदलण्यात आला.
या निर्णयाचा फायदा झाला तो इंदापूरचे आमदार दत्तात्रय भरणे यांना. अजित पवार यांचे ते अत्यंत विश्वासू मानले जातात. पूर्वीही ते महाविकास आघाडीच्या मंत्रिमंडळात होते. महायुती सरकारमध्येही त्यांच्याकडे क्रीडा मंत्रालय होतंच. आता कृषी खात्यासारख्या महत्वाच्या विभागाची जबाबदारी त्यांच्यावर टाकण्यात आली आहे.
भरणे यांचा मतदारसंघ बारामतीला लागून असलेल्या इंदापूरमधून आहे, त्यामुळे अजित पवारांचा वरदहस्त त्यांना कायम राहिला आहे. कृषी क्षेत्रातील समस्या, शेतकऱ्यांचे प्रश्न आणि केंद्राशी समन्वय अशा अनेक मुद्द्यांवर आता भरणेंची परीक्षा लागणार आहे.
कोकाटेंवरून वादाच्या नजरा सरकारवर पडू नयेत, म्हणून महायुतीने त्यांच्या खात्याचा बळी दिला आहे, अशी चर्चा राजकीय वर्तुळात रंगत आहे. पण यामुळे सरकारला स्थैर्य मिळेल का, हे पाहणं औत्सुक्याचं ठरणार आहे.
