ब्रिटेन : लोकप्रियतेत झालेली घट आणि नेतृत्वात बदलाची वाढती मागणी यामुळे लेबर पार्टीमधील वाढत्या दबावाला बळी पडून, ब्रिटनचे पंतप्रधान कीर स्टार्मर यांनी सोमवारी आपल्या राजीनाम्याची घोषणा केली. त्यांच्या या जाण्यामुळे, गेल्या 10 वर्षांत आपला कार्यकाळ पूर्ण करण्यापूर्वीच पदावरून पायउतार व्हावे लागलेले स्टार्मर हे ब्रिटनचे सहावे पंतप्रधान ठरले आहेत. '10 डाऊनिंग स्ट्रीट'च्या बाहेर केलेल्या निवेदनात स्टार्मर यांनी सांगितले की, त्यांनी पक्षांतर्गत व्यक्त केल्या गेलेल्या चिंतांची दखल घेऊन बाजूला होण्याचा निर्णय घेतला आहे. मात्र, आपला उत्तराधिकारी निवडला जाईपर्यंत ते पदावर कायम राहतील. लेबर पक्षाचे नेते आणि पंतप्रधान म्हणून आपल्या कार्यकाळाचा आढावा घेताना, स्टार्मर यांनी सरकारच्या कामगिरीचे समर्थन केले. तसेच अर्थव्यवस्था, कामगारांचे हक्क व गरिबी निर्मूलन या क्षेत्रांतील महत्त्वपूर्ण यशावर प्रकाश टाकला.
जुलै 2024 च्या सार्वत्रिक निवडणुकीत लेबर पक्षाला प्रचंड विजय मिळवून दिल्यानंतर दोन वर्षांपेक्षाही कमी कालावधीत ते पद सोडत आहेत. ही घटना ब्रिटिश राजकारणातील एक नाट्यमय वळण ठरली आहे. देशाला उद्देशून बोलताना, स्टारमर यांनी लेबर पक्षाची धुरा हाती घेतली तेव्हा त्यांना ज्या आव्हानांचा सामना करावा लागला होता, त्यांची आठवण करून दिली. "सहा वर्षांपूर्वी मला 'लेबर पार्टी'ची धुरा सांभाळण्याची जबाबदारी मिळाली होती. माझा पक्ष आता संपला आहे, असे मला वारंवार सांगितले जात होते. पण आम्ही लोकांना चुकीचे ठरवले आणि पक्षात बदल घडवून आणले," असे ते म्हणाले. स्टार्मर यांनी पुढे सांगितले की, "कठोर परिश्रमांमुळे" पक्षात आमूलाग्र बदल झाले आणि अधिक न्याय्य ब्रिटनच्या निर्मितीचे ध्येय गाठण्यास मदत झाली. "कठोर परिश्रमांनी आमच्या पक्षात बदल घडवले. प्रतिष्ठा आणि सन्मान असलेला एक न्याय्य देश घडवण्यासाठी आम्ही काम केले. केवळ विशेषाधिकारप्राप्त वर्गासाठी नव्हे, तर सर्वांसाठी संपत्ती आणि संधी उपलब्ध करून दिल्या," असे ते म्हणाले.
पदत्याग करणारे पंतप्रधान स्टार्मर यांनी आपल्या सरकारच्या आर्थिक कामगिरीचाही उल्लेख केला. "आम्ही अधिक मजबूत अर्थव्यवस्था निर्माण केली, वेतनात जलद वाढ साधली, गुंतवणुकीला चालना दिली, काटकसरीच्या कठोर धोरणांचा (ऑस्टेरिटी) अंत केला आणि कामगारांच्या हक्कांमध्ये मोठी सुधारणा केली," असे स्टार्मर म्हणाले. त्यांनी असाही दावा केला की, त्यांच्या प्रशासनाने "पाच लाख लोकांना गरिबीतून बाहेर काढले" आणि ब्रिटन "प्रतिष्ठा आणि सन्मानासाठी" ठामपणे उभा राहील याची सुनिश्चिती केली. 'लेबर पार्टी'च्या अंतर्गत राजकीय चर्चांमध्ये आपल्या भविष्याबाबतचे प्रश्न मोठ्या प्रमाणावर चर्चिले जात होते, याची कबुलीही स्टार्मर यांनी दिली. "पुढील निवडणुकीत पक्षाचे नेतृत्व करण्यासाठी मी सर्वात योग्य व्यक्ती आहे का, हा प्रश्न माझा पक्ष आता उपस्थित करत आहे," असे ते म्हणाले.
