Maratha Aarakshan: मराठा समाजाला आरक्षण देण्याच्या मागणीवरून महाराष्ट्रातील राजकीय घडामोडींना पुन्हा एकदा मोठा वेग आला आहे. आंदोलक मनोज जरांगे पाटील यांनी दिलेल्या नव्या आंदोलनाच्या इशाऱ्यानंतर राज्य सरकार पूर्णपणे सतर्क मोडवर आले असून परिस्थिती हाताळण्यासाठी तातडीने हालचाली सुरू करण्यात आल्या आहेत. जरांगे यांची मनधरणी करण्यासाठी आणि त्यांच्या मागण्यांवर सकारात्मक तोडगा काढण्यासाठी सरकारच्या वतीने 3 प्रमुख कॅबिनेट मंत्री आणि 1 आमदारांचे विशेष शिष्टमंडळ आज अंतरवाली सराटी येथे पोहोचून थेट चर्चा करणार आहे.
मंत्र्यांचा ताफा छत्रपती संभाजीनगरमार्गे अंतरवाली सराटीत
या महत्त्वाच्या चर्चेसाठी मराठा आरक्षण उपसमितीचे अध्यक्ष राधाकृष्ण विखे पाटील, उद्योगमंत्री उदय सामंत, मंत्री शंभूराजे देसाई आणि आमदार प्रसाद लाड यांचा समावेश असलेले शिष्टमंडळ तयार करण्यात आले आहे. मिळालेल्या माहितीनुसार, उद्योगमंत्री उदय सामंत हे सकाळी 11:30 च्या सुमारास छत्रपती संभाजीनगर विमानतळावर दाखल होऊन तिथून थेट अंतरवाली सराटीच्या दिशेने रवाना होणार आहेत. दुपारी 1:00 च्या सुमारास हे सर्व नेते जरांगे पाटील यांची भेट घेऊन आरक्षणाच्या अंमलबजावणीबाबत सविस्तर संवाद साधणार आहेत.
29 ऑगस्टचे उपोषण आणि मुंबईतील आझाद मैदानाचे नियोजन
मनोज जरांगे पाटील यांनी मराठा आरक्षणाच्या प्रमुख मागण्यांसाठी येत्या 29 ऑगस्ट पासून पुन्हा एकदा तीव्र आंदोलनाचा इशारा दिला आहे. अंतरवाली सराटी येथे आमरण उपोषणाला बसण्याची त्यांची पूर्वतयारी असून, मागण्या मान्य न झाल्यास थेट मुंबईत धडक देण्याचा इशारा त्यांनी दिला आहे. या पार्श्वभूमीवर मुंबईतील आझाद मैदानात संभाव्य आंदोलनासाठी मैदानाची पाहणी करण्यात आली आहे. मागील आंदोलनादरम्यान पावसाने झालेला चिखल, व्यासपीठाची अपुरी जागा आणि माध्यमांच्या प्रतिनिधींची सोय यांसारख्या समस्या टाळण्यासाठी यंदा विशेष आणि सुटसुटीत नियोजन केले जात आहे.
दुसरीकडे अंतरवाली सराटीमध्येही आंदोलनाला पाठिंबा देण्यासाठी समाजबांधवांची एकजूट पाहायला मिळत आहे. गोदाकाठच्या 123 गावांची विशेष बैठक घेऊन आंदोलनाच्या नियोजनाची जबाबदारी वाटून देण्यात आली आहे. आंदोलकांसाठी पिण्याचे पाणी, अन्न आणि वैद्यकीय सुविधांचा पुरवठा खंडित होऊ नये, यासाठी विशेष व्यवस्था केली जात आहे. आज होणाऱ्या या हायव्होल्टेज बैठकीत सरकार काही ठोस मार्ग काढते की जरांगे आपल्या उपोषणाच्या भूमिकेवर ठाम राहतात, याकडे संपूर्ण राज्याचे लक्ष लागले आहे.
