Tukaram Mundhe FDA Maharashtra Warning: अन्न आणि औषध प्रशासनाचा (FDA) अधिकृत परवाना मिळवून देण्याच्या बहाण्याने नागरिकांची आर्थिक फसवणूक होत असल्याचे प्रकार उघडकीस आले आहेत. एफडीएचे अधिकारी किंवा कर्मचारी यांच्या नावाचा गैरवापर करत काही दलाल व भामटे परवानाधारकांकडून पैसे उकळत असल्याचे समोर आल्यावर प्रशासनाने कठोर पावले उचलली आहेत. या पार्श्वभूमीवर, अशा कोणत्याही दलालांच्या किंवा मध्यस्थांच्या जाळ्यात न अडकता केवळ अधिकृत यंत्रणेचाच वापर करण्याचे आवाहन राज्याचे अन्न व औषध प्रशासन आयुक्त तुकाराम मुंढे यांनी केले आहे.
परवान्यासाठी कोणत्याही एजंटची नियुक्ती नाही; एफडीएचे स्पष्टीकरण
औषध उत्पादक, घाऊक तसेच किरकोळ औषध विक्रेते, फूड बिझनेस ऑपरेटर (FBO) आणि परवान्यासाठी अर्ज करणाऱ्या सर्व संबंधितांना प्रशासनाने महत्त्वाची माहिती दिली आहे. एफडीएकडून स्पष्ट करण्यात आले आहे की:
– कोणताही मध्यस्थ नाही: परवाना मिळवून देणे किंवा अर्जाची छाननी करणे यासाठी एफडीएने कोणत्याही खाजगी व्यक्ती, संस्था किंवा एजंटची नियुक्ती केलेली नाही.
– ऑफलाइन व्यवहारांवर बंदी: कोणत्याही व्यक्तीने परवान्याच्या नावाखाली पैशांची मागणी केल्यास तो थेट फसवणुकीचा प्रकार मानला जावा.
हेही वाचा – मद्यविक्री दुकानांच्या स्थलांतरासाठी आता सोसायटीचे NOC बंधनकारक; सरकारचा नवा निर्णय
संपूर्ण प्रक्रिया आता ऑनलाइन; अर्ज करण्याची पद्धत
नागरिकांच्या सुविधेसाठी आणि पारदर्शकता राखण्यासाठी परवाना वितरणाची संपूर्ण प्रणाली ऑनलाइन करण्यात आली आहे. अर्जदार स्वतः खालील अधिकृत संकेतस्थळांवर जाऊन अर्ज करू शकतात:
– औषध परवान्यासाठी (Drug License): fdamfg.maharashtra.gov.in
– अन्न परवान्यासाठी (Food License): foscos.fssai.gov.in
– पोर्टलवर सर्व प्रकारच्या मार्गदर्शक सूचना (Guidelines) उपलब्ध करून देण्यात आल्या असून, आवश्यक कागदपत्रांसह सहजरीत्या ऑनलाईन अर्ज सादर करता येतो.
लाच मागणाऱ्यांची तक्रार करा; नाव ठेवले जाणार गोपनीय
जर अन्न व औषध प्रशासनातील कोणत्याही अधिकाऱ्याच्या नावाने किंवा प्रत्यक्ष कर्मचाऱ्याकडून अर्जावर कारवाई करण्यासाठी पैशांची मागणी केली जात असेल, तर नागरिकांनी घाबरून न जाता तात्काळ आयुक्तालयाच्या ईमेलवर तक्रार नोंदवावी. माहिती देणाऱ्या व्यक्तीची ओळख पूर्णपणे गोपनीय ठेवली जाईल, असे आश्वासन प्रशासनाने दिले आहे.
'परवान्यासाठी कोणत्याही मध्यस्थाची गरज नाही. अर्जासाठी केवळ अधिकृत ऑनलाइन प्रणालीचा वापर करा आणि लाच मागणाऱ्यांविरोधात त्वरित तक्रार दाखल करा,' असे आवाहनात्मक वक्तव्य आयुक्त तुकाराम मुंढे यांनी केले आहे.
हेही वाचा – Festival Holiday : सरकारचा जीआर जारी! आता दहीहंडीला नाही, तर रक्षाबंधनला मिळणार सुट्टी; तारखा बघून ठेवा
