Tukaram Mundhe FDA Action Pune: गणेशोत्सव आणि आगामी सणासुदीच्या काळात अन्नपदार्थांमधील भेसळ रोखण्यासाठी अन्न आणि औषध प्रशासनाने (FDA) पुणे शहरात धडक मोहीम हाती घेतली आहे. एफडीएचे आयुक्त आयएएस तुकाराम मुंढे यांच्या मार्गदर्शनाखाली पथकाने पुण्यातील 12 वेगवेगळ्या आस्थापनांवर छापे टाकत सुमारे 56 लाख रुपयांचा संशयास्पद आणि भेसळयुक्त अन्नसाठा जप्त केला आहे. या धडक कारवाईमुळे संपूर्ण पुणे शहरातील भेसळखोरांचे धाबे दणाणले आहेत. याशिवाय, 10 ते 15 सप्टेंबर दरम्यान राबवलेल्या विशेष मोहिमेत प्रतिबंधित अन्नपदार्थांचा साठा करणाऱ्या 14 ठिकाणी कारवाई करून 20 लाख 26 हजार रुपयांचा मुद्देमाल जप्त करण्यात आला आहे.
जप्त साठ्याचे नमुने प्रयोगशाळेकडे; पुणे विभागातील इतर जिल्ह्यांतही तपासणी तीव्र
यापूर्वी गणेशोत्सवाच्या सुरुवातीला बुधवार पेठ परिसरातून 4 ट्रक पनीर आणि खवा जप्त केल्यानंतर एफडीएने आपली तपासणी मोहीम अधिक तीव्र केली आहे. जप्त केलेल्या सर्व अन्नसाठ्याचे नमुने रासायनिक विश्लेषणासाठी प्रयोगशाळेत पाठवण्यात आले असून, त्यांचा अहवाल प्राप्त झाल्यानंतर संबंधितांवर कडक कायदेशीर कारवाई केली जाईल, अशी माहिती प्रशासनाने दिली आहे. ही तपासणी मोहीम केवळ पुण्यापुरती मर्यादित नसून कोल्हापूर, सातारा आणि सांगली जिल्ह्यांमध्येही मोठ्या प्रमाणावर राबवली जात आहे. सणांच्या दिवसांत दुग्धजन्य पदार्थ, खवा, मावा आणि मिठाईची मागणी मोठ्या प्रमाणावर वाढते, त्यामुळे ग्राहकांनी खरेदी करताना उत्पादनाची तारीख, लेबल आणि दर्जा तपासूनच खरेदी करण्याचे आवाहन करण्यात आले आहे.
एफडीएच्या कारवाईचा धसका; गणेशोत्सवात केटरर्स व्यवसायाला 30 टक्के फटका
आयएएस तुकाराम मुंढे यांच्या आक्रमक कारवाईमुळे सर्वसामान्य नागरिकांमध्ये अन्नपदार्थांच्या गुणवत्तेबाबत मोठी जनजागृती झाली आहे. या वाढत्या जागरूकतेचा आणि कडक तपासणीचा थेट परिणाम यंदाच्या गणेशोत्सवात खाद्यपदार्थ पुरवणाऱ्या केटरिंग व्यवसायावर पाहायला मिळाला. शहरातील सुमारे 10,000 केटरर्सना व्यवसायात तब्बल 30 टक्के फटका बसल्याचे समोर आले आहे. ग्राहकांचा विश्वास गमावण्याची भीती आणि एफडीएची दंडात्मक कारवाई टाळण्यासाठी आता केटरर्स व्यावसायिकही सजग झाले असून त्यांनी आपल्या कार्यपद्धतीत मोठे बदल स्वीकारण्यास सुरुवात केली आहे.
कारवाई टाळण्यासाठी केटरर्सना थेट एफडीएच्या तज्ज्ञांकडून शुद्धतेचे धडे
आपला व्यवसाय आणि उपजीविका टिकवून ठेवण्यासाठी पुण्यातील केटरर्सनी स्वतःहून पुढाकार घेत अन्न सुरक्षेचे नियम शिकण्यास सुरुवात केली आहे. केटरिंग व्यावसायिकांनी थेट एफडीएच्या तज्ज्ञ अधिकाऱ्यांसमोर विशेष प्रशिक्षण सत्र आयोजित केले. या प्रशिक्षणामध्ये भेसळयुक्त दूध कसे ओळखायचे, बनावट पनीरची ओळख कशी पटवायची आणि अन्न शिजवताना कोणती काळजी घ्यायची, याचे प्रत्यक्ष धडे केटरर्सनी घेतले आहेत. प्रशासनाच्या कडक धोरणामुळे बाजारात शुद्ध व सुरक्षित अन्नपदार्थ मिळण्यास मोठी मदत होत असल्याचे दिसून येत आहे.
