Sinhagad Fort App Booking : ऐतिहासिक सिंहगड किल्ल्यावर 15 ऑगस्टच्या स्वातंत्र्यदिनी पर्यटकांच्या अतिप्रचंड गर्दीमुळे दोन गटांत हिंसक वाद, गैरवर्तन आणि दगडफेकीची दुर्दैवी घटना घडली होती. या गंभीर घटनेची दखल घेत वन विभागाने गडावरील कायदा, सुव्यवस्था आणि सुरक्षा अबाधित राखण्यासाठी एक मोठा धोरणात्मक निर्णय घेतला आहे. वीकेंड आणि सार्वजनिक सुट्ट्यांच्या दिवशी होणारी बेसुमार गर्दी नियंत्रित करण्यासाठी आता पर्यटकांना गडावर जाण्यापूर्वी ऑनलाइन नोंदणी करणे अनिवार्य केले जाणार आहे. महाराष्ट्रात पर्यटनाचे नियंत्रण करण्यासाठी ॲपद्वारे पूर्वनोंदणीची सक्ती असणारा सिंहगड हा पहिलाच ऐतिहासिक किल्ला ठरणार आहे.
'किल्ले सिंहगड' ॲप आणि गर्दीवर रिअल-टाईम वॉच
पर्यटन अधिक शिस्तबद्ध करण्यासाठी वन विभागाने 'किल्ले सिंहगड' नावाचे विशेष मोबाईल ॲप विकसित केले आहे. पुणे वन विभागाचे अधिकारी मनोज बारबोले यांनी दिलेल्या माहितीनुसार, या तंत्रज्ञानामुळे गडावर प्रवेश करणाऱ्या नागरिक व वाहनांच्या संख्येची अचूक माहिती प्रशासनाला एका क्लिकवर उपलब्ध होईल. गडाची क्षमता पूर्ण होताच प्रवेशद्वारावरच पुढील प्रवेश रोखला जाईल. याशिवाय, कृत्रिम बुद्धिमत्ता (AI) तंत्रज्ञानाचा आणि आधुनिक सीसीटीव्ही यंत्रणेचा वापर करून संपूर्ण परिसरावर थेट नजर ठेवली जाणार आहे. मुख्य दरवाजाव्यतिरिक्त चोरट्या पायवाटेने होणारी घुसखोरी रोखण्यासाठीही या प्रणालीचा विशेष फायदा होईल.
वाहतूक कोंडीवर तोडगा आणि 24 तास गस्तीची मागणी
पुणेकरांचे आवडते पर्यटन स्थळ असल्याने शनिवार, रविवार आणि सण-उत्सवाच्या दिवशी घाट रस्त्यावर किलोमीटर लांब वाहनांच्या रांगा लागून वाहतूक पूर्णपणे ठप्प होते. नव्या डिजिटल नियमावलीमुळे ही वाहतूक कोंडी फुटण्यास मदत होणार आहे. दुसरीकडे, गडाचे नैसर्गिक आणि ऐतिहासिक वैभव जपण्यासाठी हवेली आपत्ती व्यवस्थापन पथकाचे तानाजी भोसले यांनी सिंहगडावर समर्पित वन विभाग कार्यालय स्थापन करण्याची मागणी केली आहे. गडावर चोवीस तास कर्मचाऱ्यांची गस्त, बेकायदेशीर वृक्षतोड व अतिक्रमणांवर बंदी आणि पर्यटकांच्या सुरक्षेसाठी तीन पाळ्यांमध्ये तैनात पथक असा सर्वसमावेशक सुरक्षा आराखडा राबवण्याचा प्रशासनाचा मानस आहे.
