Earthquake: चीनच्या नैऋत्य भागाला सोमवारी पहाटे भूकंपाच्या तीव्र धक्क्यांनी हादरवून सोडले. ग्वांग्शी प्रांतातील लिउझोऊ शहरात या भूकंपाची नोंद झाली असून, रिश्टर स्केलवर त्याची तीव्रता 5.2 इतकी मोजली गेली आहे. या भीषण नैसर्गिक आपत्तीत आतापर्यंत 2 जणांचा मृत्यू झाल्याची अधिकृत माहिती समोर आली आहे, तर 1 व्यक्ती अद्याप बेपत्ता आहे. ढिगाऱ्याखाली कोणी दबले आहे का, याचा शोध प्रशासनाकडून घेतला जात आहे.
मोठ्या प्रमाणावर वित्तहानी आणि बचाव कार्य
भूकंपामुळे लिउझोऊ शहरात मोठे नुकसान झाले असून एकूण 13 इमारती पत्त्यासारख्या कोसळल्या आहेत. सरकारी वृत्तसंस्था 'शिन्हुआ' आणि 'सीसीटीव्ही'ने दिलेल्या वृत्तानुसार, परिस्थितीचे गांभीर्य ओळखून प्रशासनाने युद्धपातळीवर मदत कार्य सुरू केले आहे. खबरदारीचा उपाय म्हणून बाधित क्षेत्रातील 7,000 हून अधिक लोकांना तातडीने सुरक्षित स्थळी हलवण्यात आले आहे. या घटनेत 4 जण जखमी झाले असून त्यांना जवळच्या रुग्णालयात दाखल करण्यात आले आहे; सुदैवाने त्यांची प्रकृती सध्या स्थिर असल्याचे डॉक्टरांनी सांगितले आहे.
नागरी सुविधा सुरक्षित, रेल्वे वाहतुकीला ब्रेक
भूकंपाचे धक्के तीव्र असले तरी, सुदैवाने वीज, पाणी, गॅस आणि दळणवळण यंत्रणा विस्कळीत झालेली नाही. या अत्यावश्यक सेवा सध्या सुरळीत सुरू आहेत. मात्र, प्रवाशांच्या सुरक्षेचा विचार करून रेल्वे प्रशासनाने रेल्वे मार्गांची तपासणी सुरू केली आहे. रेल्वे रुळांच्या आणि पुलांच्या संरचनात्मक सुरक्षिततेची खात्री पटल्यानंतरच वाहतूक पूर्ण क्षमतेने सुरू केली जाईल. या तपासणी प्रक्रियेमुळे अनेक रेल्वे गाड्यांना विलंब होण्याची शक्यता वर्तवण्यात आली असून प्रवाशांना सहकार्य करण्याचे आवाहन करण्यात आले आहे.
