छत्रपती संभाजीनगर जिल्ह्यातील पैठण तालुक्यात एका ५२ वर्षीय शेतकऱ्याने आत्महत्या केल्याची दुर्दैवी घटना समोर आली आहे. खादगाव येथे ही घटना घडली. सिकंदर हसन शेख असं मृत शेतकऱ्याचं नाव आहे. या घटनेमुळे परिसरात हळहळ व्यक्त होत आहे.
मिळालेल्या माहितीनुसार, शुक्रवारी सायंकाळच्या सुमारास सिकंदर शेख हे शेताकडे गेले होते. यावेळी त्यांनी शेतातील लिंबाच्या झाडाला ठिबक सिंचनाच्या नळीच्या सहाय्याने गळफास घेतल्याचे समोर आले. काही वेळाने ही बाब लक्षात आल्यानंतर ग्रामस्थांनी घटनास्थळी धाव घेतली.
ग्रामस्थांनी सिकंदर शेख यांना तातडीने पाचोड ग्रामीण रुग्णालयात दाखल केलं. मात्र, तेथील वैद्यकीय अधिकारी डॉ. शिवाजी पवार यांनी तपासणी केल्यानंतर त्यांना मृत घोषित केलं.
दरम्यान, सिकंदर शेख यांच्या आत्महत्येमागे शेतीशी संबंधित आर्थिक अडचणी असल्याची प्राथमिक माहिती समोर आली आहे. पैठण तालुक्यात यंदा जून महिन्यापासून पावसाचं प्रमाण कमी राहिल्याने खरीप हंगामावर त्याचा परिणाम झाला आहे. पावसाने अपेक्षित साथ न दिल्याने अनेक शेतकऱ्यांसमोर पिकांच्या उत्पादनाचा प्रश्न निर्माण झाला आहे.
सिकंदर शेख यांनी कर्ज काढून खरीप पिकांची पेरणी केली होती. मात्र, पावसाअभावी पिकांची परिस्थिती खराब झाली. त्यामुळे उत्पादनातून अपेक्षित उत्पन्न मिळण्याची शक्यता कमी झाली होती. दुसरीकडे शेतीसाठी झालेला खर्च आणि कर्जाची परतफेड यामुळे ते काही दिवसांपासून तणावात असल्याचं कुटुंबीय आणि ग्रामस्थांकडून सांगण्यात येत आहे.
शेतीमधून मिळणाऱ्या उत्पन्नावर कुटुंबाचा उदरनिर्वाह अवलंबून असताना पिकांचं नुकसान झाल्यास शेतकऱ्यांसमोर आर्थिक संकट उभं राहतं. कर्जाचा वाढता बोजा आणि शेतीवरील खर्च यामुळे अनेक शेतकरी अडचणीत येतात. सिकंदर शेख यांच्या घटनेनंतर पुन्हा एकदा शेतकऱ्यांच्या आर्थिक आणि मानसिक अडचणींचा प्रश्न ऐरणीवर आला आहे.
या घटनेची नोंद पाचोड पोलिस ठाण्यात करण्यात आली आहे. पोलिसांकडून या प्रकरणाचा पुढील तपास सुरू आहे. आत्महत्येच्या नेमक्या कारणाबाबत पोलिस तपासातून अधिक माहिती समोर येणार आहे.
