Mumbai Bus Strike: मुंबईची जीवन वाहिनी मानल्या जाणाऱ्या बृहन्मुंबई विद्युत पुरवठा आणि परिवहन (BEST) उपक्रमातील प्रलंबित मागण्यांवरून वातावरण चांगलेच तापले आहे. बीईएसटी वर्कर्स युनियनचे सरचिटणीस शशांक राव यांनी 18 ऑगस्ट रोजी सकाळी 11:30 वाजता ऑपेरा हाऊस येथील केनेडी ब्रिजजवळील कार्यालयात बेमुदत उपोषणाची घोषणा केली आहे. मागण्या पूर्ण होईपर्यंत हे आंदोलन मागे घेतले जाणार नाही, असा आक्रमक पवित्रा संघटनेने घेतल्यामुळे सर्वसामान्यांच्या दैनंदिन प्रवासावर मोठा परिणाम होण्याची शक्यता वर्तवण्यात येत आहे.
वेतन करार अन् सातव्या वेतन आयोगाची अंमलबजावणी करण्याची मुख्य मागणी
कर्मचाऱ्यांच्या अनेक वर्षांपासून रखडलेल्या वेतन करारांची तात्काळ पूर्तता करावी, ही युनियनची मुख्य अट आहे. यामध्ये 2016 ते 2021 आणि 2021 ते 2026 या दोन्ही कालावधींतील वेतन करार त्वरित लागू करण्याची मागणी करण्यात आली आहे. यासोबतच कर्मचाऱ्यांना सातव्या वेतन आयोगाच्या शिफारशींनुसार सुधारित वेतन मिळावे आणि मुंबई महानगरपालिकेच्या कर्मचाऱ्यांप्रमाणेच समान वेतनश्रेणी लागू केली जावी, असा स्पष्ट आग्रह संघटनेने धरला आहे.
वेट लीज कर्मचाऱ्यांना ‘समान काम समान वेतन’ आणि निवृत्तांच्या देण्यांवर भर
या आंदोलनात केवळ कायमस्वरूपी कर्मचारीच नव्हे, तर खासगी कंपन्यांमार्फत चालवल्या जाणाऱ्या वेट लीज बसवरील कामगार आणि सेवानिवृत्त कर्मचाऱ्यांचे प्रश्नही प्राधान्याने मांडले जात आहेत. वेट लीज कर्मचाऱ्यांना ‘समान कामासाठी समान वेतन’ व अन्य सेवा-सुविधा मिळायला हव्यात, अशी मागणी जोर धरत आहे. तसेच निवृत्त कर्मचाऱ्यांची प्रलंबित ग्रॅच्युइटी आणि इतर आर्थिक देणी वेळेत अदा करून बेस्ट उपक्रमाच्या आर्थिक संकटावर मात करण्यासाठी आवश्यक निधीला मंजुरी देण्याची विनंती करण्यात आली आहे.
जूननंतर पुन्हा आंदोलनाचा भडका; नोकरदार आणि मध्यमवर्गीयांचे हाल होणार
यापूर्वी जून महिन्यातही कर्मचाऱ्यांनी उपोषण केले होते, ज्याचा मोठा फटका रोजच्या प्रवाशांना सहन करावा लागला होता. कमी तिकिट दर आणि सोयीचा प्रवास यामुळे मुंबईतील कामगार व मध्यमवर्गीय नागरिक बेस्ट बस प्रवासावर मोठ्या प्रमाणावर अवलंबून असतात. आता पुन्हा एकदा हे बेमुदत आंदोलन सुरू झाल्याने प्रवाशांचे हाल होणार असून या कोंडीवर प्रशासन काय मार्ग काढते, याकडे सर्वांचे लक्ष लागले आहे.
