Dhule Monkey Funeral: धुळे जिल्ह्यातून माणुसकी आणि प्राणीमात्रांवरील प्रेमाचे एक आगळेवेगळे उदाहरण समोर आले आहे. विजेचा तीव्र धक्का लागल्याने एका वानराचा दुर्दैवी मृत्यू झाला. मात्र, या मुक्या प्राण्याच्या मृत्यूने हळहळलेल्या गावकऱ्यांनी केवळ दुःख व्यक्त करून न थांबता, या वानरावर अत्यंत भक्तीभावाने आणि हिंदू रितीरिवाजांनुसार अंत्यसंस्कार केले.
विजेच्या तारेचा लागला धक्का
मिळालेल्या माहितीनुसार, हे वानर परिसरात वावरत असताना अचानक त्याचा विद्युत वाहिनीशी संपर्क आला. विजेचा तीव्र शॉक लागल्याने वानराचा जागीच मृत्यू झाला. वानर मृतावस्थेत पडल्याचे पाहताच परिसरातील नागरिकांनी मोठी गर्दी केली. हनुमानजींचे रूप मानल्या जाणाऱ्या या वानराच्या मृत्यूने संपूर्ण गाव सुन्न झाले होते.
वाजत-गाजत काढली अंत्ययात्रा
वानराचा मृत्यू झाल्यानंतर गावकऱ्यांनी एकत्र येत त्याच्यावर अंत्यसंस्कार करण्याचा निर्णय घेतला. हिंदू परंपरेनुसार वानराच्या पार्थिवाला फुलांनी सजवलेल्या पालखीत ठेवण्यात आले होते. यावेळी ‘राम नाम सत्य आहे’ आणि ‘जय हनुमान’च्या जयघोषात गावकऱ्यांनी वानराची अंत्ययात्रा काढली. या अंत्ययात्रेमध्ये अबालवृद्धांसह तरुणांची आणि महिलांची मोठी उपस्थिती पाहायला मिळाली.
हेही वाचा – Dhule Breaking : अविवाहित असून सहा महिन्यांची गरोदर, भीतीपोटी केलं असं काही अन् थेट जीवावर बेतलं
भक्ती आणि श्रद्धेचा संगम
गावातील स्मशानभूमीत पूर्ण विधीवत पूजा करून वानराला निरोप देण्यात आला. यावेळी उपस्थित असलेल्या अनेकांचे डोळे पाणावले होते. या घटनेची चर्चा सध्या संपूर्ण जिल्ह्यात होत असून, गावकऱ्यांनी जपलेल्या या परंपरेचे आणि संवेदनशीलतेचे सर्वत्र कौतुक केले जात आहे.
