Maharashtra Weather Update: जुलै महिना आणि ऑगस्टच्या सुरुवातीला धुवाधार बरसल्यानंतर आता महाराष्ट्रातून पावसाने काढता पाय घेतल्याचे चित्र आहे. राज्याच्या विविध भागांत मुसळधार सरींऐवजी सूर्यप्रकाशाचे दर्शन घडत असून, उन्हाचा चटका अन् उकाडा वाढू लागला आहे. हवामान खात्याने दिलेल्या ताज्या अपडेटनुसार, 21 ऑगस्ट रोजी राज्यभरात बहुतांश ठिकाणी केवळ अंशतः ढगाळ हवामान राहील. आगामी काळात पावसाचा जोर कमीच राहण्याचे संकेत असल्याने नागरिकांना उकाड्याचा सामना करावा लागणार आहे.
पुढील महिनाभर सरासरीपेक्षा कमी पर्जन्यमान
भारतीय हवामान विभागाच्या अंदाजानुसार, 20 ऑगस्ट ते 3 सप्टेंबर या दोन आठवड्यांच्या कालावधीत राज्यभर पावसाची तीव्र तूट जाणवेल. इतकेच नव्हे तर, सप्टेंबरच्या पहिल्या पंधरवड्यातही सरासरीच्या तुलनेत अत्यंत कमी पाऊस पडण्याची शक्यता वर्तवण्यात आली आहे. आधीच विदर्भ व मराठवाड्यातील अनेक जिल्ह्यांत पावसाची मोठी तुटवडा नोंदवला गेला आहे. अशा परिस्थितीत पावसाचा हा प्रदीर्घ खंड शेतीसाठी घातक ठरू शकतो, असा इशारा हवामान संशोधन विभागाचे माजी प्रमुख कृष्णानंद होसाळीकर यांनी दिला आहे.
सोयाबीन, कापूस अन् तुरीला पावसाच्या खंडाची झळ
सध्या राज्यातील बहुतांश खरीप पिके पक्व होण्याच्या अंतिम टप्प्यात आहेत. अशा वेळी जमिनीतील ओलावा वेगाने कमी झाल्यास सोयाबीन, कापूस, मका आणि तूर या पिकांच्या वाढीवर गंभीर परिणाम होऊन उत्पादनात घट येण्याची दाट शक्यता आहे. ज्या भागांत पूर्वमोसमी व जुलैतील पावसामुळे जमिनीत पुरेसा ओलावा शिल्लक आहे, तेथे काही काळ दिलासा मिळेल; मात्र पावसाने दीर्घकाळ हुलकावणी दिल्यास शेतकरी मोठ्या आर्थिक संकटात सापडू शकतात.
कोकण, मुंबई अन् पश्चिम महाराष्ट्रात केवळ तुरळक सरी
मुंबईसह संपूर्ण कोकण किनारपट्टी, ठाणे व लगतच्या परिसरामध्ये अधूनमधून ढग जमा होतील; परंतु केवळ हलक्या ते मध्यम स्वरूपाच्या तुषार सरींचीच अपेक्षा आहे. मुसळधार पावसाची शक्यता मावळली आहे. दुसरीकडे, पुणे शहर आणि सह्याद्रीच्या घाटमाथ्यावरही जुलैतील अतिवृष्टीच्या तुलनेत शांतता असून, केवळ ढगाळ हवामानासह रिमझिम पावसाचा अंदाज आहे.
हेही वाचा – Narali Purnima 2026 : तिथी, पूजा, विधी आणि महत्त्व; जाणून घ्या यंदाच्या नारळी पौर्णिमा सणाचा शुभू मुहूर्त
उकाड्याने नागरिक हैराण
पावसाने विश्रांती घेतल्यामुळे येत्या काही दिवसांत राज्यातील कमाल तापमानात 2 ते 3 अंश सेल्सिअसची वाढ होण्याचा अंदाज हवामान विभागाने व्यक्त केला आहे. ढगाळ वातावरण आणि उन्हाची तीव्र किरणे यामुळे हवेतील दमटपणा वाढून प्रचंड उकाडा जाणवेल. विशेषतः विदर्भात पुढील 72 तासांत रात्रीच्या (किमान) तापमानातही वाढ होणार आहे. विदर्भ व मराठवाड्यातील शेतकरी अजूनही दमदार पावसाच्या प्रतीक्षेत असले तरी, पुढील 5 दिवसांत तेथे केवळ तुरळक ठिकाणीच पावसाची शक्यता आहे. त्यामुळे हवामानातील या बदलांच्या पार्श्वभूमीवर नागरिकांनी व शेतकऱ्यांनी स्थानिक प्रशासनाच्या अधिकृत हवामान सूचनांकडे लक्ष ठेवावे.
