Dating App Scam: छत्रपती संभाजीनगर शहरात तरुण पिढीला भुरळ घालून आर्थिक फसवणूक करणाऱ्या एका आंतरराज्यीय 'लेडीज गँग'चा पोलिसांकडून पर्दाफाश करण्यात आला आहे. सोशल मीडिया आणि विविध डेटिंग अॅप्सचा वापर करून तरुणी प्रथम तरुणांशी गोड बोलून जवळीक साधत असत. त्यानंतर संभाजीनगरमधील बीड बायपास आणि चिकलठाणा भागातील विशिष्ट बार किंवा रेस्टॉरंटमध्ये भेटण्याचे निश्चित केले जायचे. बारमध्ये आल्यानंतर अतिशय साध्या किंवा स्वस्त दारू आणि पदार्थांचे हजारो रुपयांचे फुगवलेले बिल हातात टेकवून तरुणांची मोठी लूट केली जात असल्याचे तपासात समोर आले आहे.
25 ते 30 हजार रुपयांचे बनावट बिल; नकार दिल्यास गुंडांमार्फत दबाव
फसवणुकीचा हा पॅटर्न अत्यंत नियोजनबद्ध पद्धतीने राबवला जात होता. अवघ्या काही शे रुपयांच्या ऑर्डरवर 25 ते 30 हजार रुपयांपर्यंतचे अवाजवी बिल आकारले जायचे. एखाद्या तरुणाने या बिलाला विरोध दर्शवल्यास किंवा पैसे देण्यास नकार दिल्यास, बारचालक आणि तेथे तैनात असलेले बाऊन्सर अथवा गुंड तरुणांवर मानसिक व शारीरिक दबाव आणून जबरीने पैसे उकळत असत. या रॅकेटमध्ये काही बारचालकांची थेट भागीदारी असून, ग्राहकांना जाळ्यात ओढून आणणाऱ्या तरुणींना एकूण बिलाच्या रकमेवर 25 ते 30 टक्केपर्यंतचे मोठे कमिशन दिले जात असल्याचा आरोप पीडितांनी केला आहे.
अनेक तरुण जाळ्यात; फार्मासिस्टसह 6 मित्रांच्या ग्रुपला लावला लाखाचा चुना
या 'मनी ट्रॅप'चे अनेक तरुण बळी ठरले आहेत. नुकत्याच उघडकीस आलेल्या एका घटनेत 6 मित्रांच्या गटाला एकत्र बारमध्ये नेऊन चक्क एक लाख रुपयांचे बिल आकारण्यात आले. तर दुसऱ्या एका प्रसंगात फार्मासिस्ट म्हणून कार्यरत असलेल्या एका तरुणाला 25 ते 30 हजार रुपयांचे बिल देऊन त्याची आर्थिक अडवणूक करण्यात आली. लाज आणि सामाजिक प्रतिष्ठेपोटी अनेक पीडित तरुण सुरुवातीला तक्रार करण्यास पुढे येत नव्हते; मात्र फसवणुकीचे प्रमाण वाढल्याने आता तरुणांकडून अशा टोळ्यांवर कडक कारवाईची मागणी केली जात आहे.
परराज्यातील टोळीचा सहभाग; पोलिसांनी दिला सावधानतेचा इशारा
या संपूर्ण प्रकरणात परराज्यातून आलेल्या तरुणींच्या टोळीचा मुख्य सहभाग असल्याचे निष्पन्न झाले आहे. शहरात वाढत्या 'डेटिंग स्कॅम'च्या पार्श्वभूमीवर पोलीस प्रशासनाने कठोर पावले उचलण्यास सुरुवात केली असून संशयित बारचालक आणि तरुणींची चौकशी सुरू आहे. दरम्यान, अनोळखी व्यक्तींशी आभासी जगात मैत्री करताना आणि अशा भेटण्याच्या आमिषांना बळी पडताना नागरिकांनी व विशेषतः तरुणांनी अत्यंत सतर्क राहावे, असे स्पष्ट आवाहन पोलिसांकडून करण्यात आले आहे.
