Iran-Israel War Impact: आखाती देशांमधील इराण-इस्रायल युद्धामुळे जागतिक बाजारपेठ पूर्णपणे विस्कळीत झाली असून, त्याचे गंभीर पडसाद आता महाराष्ट्रात उमटू लागले आहेत. या आंतरराष्ट्रीय संघर्षामुळे राज्याची निर्यात साखळी विस्कळीत झाली असून, त्याचा थेट फटका शेतकरी आणि सर्वसामान्यांच्या खिशाला बसत आहे. ऐन गुढीपाडव्याच्या तोंडावर बाजारपेठांचे गणित बिघडल्याने चिंतेचे वातावरण आहे.
साखर उद्योगाला फटका: कारखाने आणि शेतकरी संकटात
युद्धामुळे आंतरराष्ट्रीय जलमार्ग बाधित झाल्याने केंद्र सरकारने दिलेला साखरेचा निर्यात कोटा ठप्प झाला आहे. साखर परदेशात जाऊ शकत नसल्याने स्थानिक बाजारात साखरेचा साठा साचून राहिला आहे. परिणामी, साखरेच्या दरात मोठी घसरण झाली आहे. पूर्वी 3700 रुपये प्रति क्विंटल असलेली साखर आता 3200 रुपयांपर्यंत खाली आली आहे. साखरेचे दर कोसळल्याने साखर कारखाने आर्थिक संकटात सापडले असून, याचा मोठा फटका ऊस उत्पादक शेतकऱ्यांच्या एफआरपीवर (FRP) होण्याची दाट शक्यता आहे.
गुढीपाडव्याचा गोडवा महागला: साखर गाठींच्या दरात 40 टक्के वाढ
पुढील काही दिवसांत येणाऱ्या गुढीपाडव्यासाठी लागणाऱ्या साखर गाठी आणि हारांच्या किमतींनी गगनाला गवसणी घातली आहे. पंढरपूरसारख्या मोठ्या बाजारपेठांमध्ये कच्च्या मालाच्या किमती आणि मजुरी वाढल्याने गाठींच्या दरात सुमारे 40 टक्क्यांनी वाढ झाली आहे. साखरेचे दर कमी होत असले तरी प्रक्रियेचा खर्च वाढल्याने यंदाची गुढी सर्वसामान्यांसाठी महागडी ठरणार आहे.
'नो ओटीपी, नो सिलेंडर': गॅसचा तुटवडा आणि काळाबाजार
युद्धामुळे जागतिक इंधन पुरवठ्यावर परिणाम झाला असून नागपूरसारख्या मोठ्या शहरांमध्ये गॅस सिलिंडरचा प्रचंड तुटवडा निर्माण झाला आहे. गॅस एजन्सींनी आता कडक नियमावली लागू केली असून, गोदामाबाहेर 'ओटीपी'शिवाय सिलेंडर मिळणार नाही, अशा नोटीस लावण्यात आल्या आहेत. विशेषतः व्यावसायिक सिलेंडरचा पुरवठा कमी झाल्याने अनेक हॉटेल आणि रेस्टॉरंट्स बंद ठेवण्याची वेळ आली आहे. यामुळे घरगुती सिलेंडरचा काळाबाजार होण्याची भीतीही नागरिक व्यक्त करत आहेत.
हेही वाचा – Farmer Loan Waiver : मोठी बातमी! शेतकऱ्यांचे मध्यम मुदतीचे कर्ज माफ होणार? अपडेट समोर
भाजीपाला आणि केळी उत्पादक शेतकरी हवालदिल
निर्यात थांबल्याचा सर्वाधिक फटका फळ आणि भाजीपाला उत्पादकांना बसला आहे. नंदुरबारमध्ये गेल्या आठवड्यात 2200 रुपये प्रति क्विंटल असलेले केळीचे दर आता 1200 रुपयांवर आले आहेत. याशिवाय, परदेशात जाणारा उच्च दर्जाचा भाजीपाला आता स्थानिक बाजारात येत असल्याने त्याचे दर घसरले आहेत. मुंबईसह अनेक जिल्ह्यांत ग्राहकांसाठी भाजीपाला स्वस्त झाला असला तरी, उत्पादन खर्चही निघत नसल्याने शेतकऱ्यांचे मात्र कोट्यवधींचे आर्थिक नुकसान होत आहे.
