Elephant Dies After Being Hit by Train: झारखंडची राजधानी रांचीमधील हटियाहून टाटानगरला जाणाऱ्या हटिया-टाटा पॅसेंजर ट्रेनने धडक दिल्याने एका हत्तीचा मृत्यू झाला. ज्यामुळे रांचीच्या हटिया-टाटा मार्गावरील रेल्वे सेवा सध्या विस्कळीत झाली आहे. या रेल्वे मार्गावरील रेल्वे वाहतूक सामान्य होण्यासाठी सुमारे चार ते पाच तास लागू शकतात. प्राप्त माहितीनुसार, सोमवारी संध्याकाळी 7:15 वाजता जोन्ना-किटा स्टेशन दरम्यान ही घटना घडल्याचे वृत्त आहे. या घटनेनंतर या रेल्वे मार्गावरील गाड्यांची वाहतूक थांबवण्यात आली आहे.
हटिया-टाटा पॅसेंजर ट्रेनच्या धडकेत हत्तीचा मृत्यू –
या घटनेबाबत दक्षिण पूर्व रेल्वे रांची विभागाचे डीआरएम जसमीत सिंह बिंद्रा यांनी पत्रकारांना सांगितले की, हटियाहून टाटाकडे जाणाऱ्या हटिया-टाटा पॅसेंजर ट्रेनसमोर एक हत्ती आला. ट्रेनच्या धडकेत हत्तीचा मृत्यू झाला. तथापि, यामुळे ट्रेन किंवा प्रवाशांचे कोणतेही नुकसान झाले नाही. या घटनेनंतर वनविभाच्या अधिकाऱ्यांनी घटनास्थळी धाव घेतली. लवकरच रेल्वे सेवा पूर्ववत करण्यात येईल, असं रेल्वे अधिकाऱ्यांनी सांगितलं आहे.
रेल्वे रुळांवर आलेल्या हत्तीची धडक रोखण्यासाठी होणार AI चा वापर –
यापूर्वी ट्रेनच्या धडकेमध्ये अनेक हत्ती जखमी झाल्याच्या घटना घडल्या आहेत. तथापि, रेल्वे रुळांवर आलेल्या हत्तीची धडक रोखण्यासाठी, आग्नेय रेल्वेच्या चक्रधरपूर आणि रांची रेल्वे विभागांमध्ये नवीन कृत्रिम बुद्धिमत्ता (AI) आधारित इंट्रूजन डिटेक्शन सिस्टम (IDS) तंत्रज्ञानाचा वापर करण्यात येणार आहे. हत्ती ज्या ठिकाणी वारंवार जातात त्या ठिकाणांना रेल्वे ही प्रणाली बसवणार आहे.
रेल्वे ट्रॅकच्या कडेला बसवण्यात येणार IDS –
हत्तींना गाड्यांची धडक बसू नये म्हणून रेल्वे आणि वन विभागाच्या सहकार्याने हा उपक्रम हाती घेण्यात येत आहे. या AI प्रणालीद्वारे, रेल्वे रुळांजवळील हत्तींच्या हालचाली लवकर शोधता येतात. हे मुळात एक थर्मल डिव्हाइस आहे, जे रेल्वे रुळांवर स्थापित केले जाईल. हत्ती रुळावर येताच, हे उपकरण अलार्म वाजवेल, ज्यामुळे ट्रेन चालकाला सावध केले जाईल आणि हत्तींना धडक बसण्यापासून वाचवण्यात येईल.
