Pune Traffic Update: पुणे शहरातील नाना पेठ आणि आसपासच्या भागात 25 व 26 ऑगस्ट रोजी ईद-ए-मिलादचा सण मोठ्या उत्साहात साजरा केला जाणार आहे. या पार्श्वभूमीवर शहरात कायदा व सुव्यवस्था राखण्यासाठी तसेच वाहतुकीची कोंडी टाळण्यासाठी पोलीस प्रशासनाने विशेष नियोजन केले आहे. 26 ऑगस्ट रोजी नाना पेठ क्षेत्रातील मनुशाह मस्जिद येथून या पारंपरिक मिरवणुकीचा शुभारंभ होणार आहे. तेथून पुढे संत कबीर चौक, ए. डी. कॅम्प चौक, भारत सिनेमा परिसर, पद्मजी पोलिस चौकी, निशांत सिनेमा, भगवानदास चाळ, चुडामन तालीम, मुफ्ती फौज चौक मार्गे मिरवणूक पुढे सरकेल. त्यानंतर सरदार पटेल रस्ता, कुरेशी मस्जिद, जान मोहम्मद स्ट्रीट, बाबाजान दर्गाह, चारबावडी चौकी, फुलवाला गल्ली, सेंटर स्ट्रीट, एम. जी. रोड, महमद रफी चौक, कोहिनूर चौक, महावीर चौक, सरबतवाला चौक, क्वार्टर गेट आणि गोविंद हलवाई चौक असा मोठा मार्ग पार करून शुक्रवार पेठेतील प्रसिद्ध सिटी जामा मस्जिद येथे या भव्य मिरवणुकीची सांगता होईल.
रस्त्यांवरील पार्किंगवर कडक निर्बंध व दंडात्मक कारवाई
नागरिकांची सुरक्षितता आणि मिरवणुकीचा सुरळीत प्रवाह लक्षात घेता वाहतूक शाखेने मिरवणूक मार्ग तसेच त्याला जोडणाऱ्या सर्व मुख्य व उपमार्गांवर 100 मीटरच्या अंतरापर्यंत कोणत्याही प्रकारच्या गाड्या उभ्या करण्यास पूर्णपणे मनाई केली आहे. या नियमाचे उल्लंघन करणाऱ्या दुचाकी, चारचाकी, टेम्पो किंवा हातगाड्यांवर तात्काळ जप्तीची व दंडात्मक कारवाई केली जाईल, असा स्पष्ट इशारा पोलिसांनी दिला आहे. याशिवाय, खडकी परिसरातील मिरवणूक टिळक चौक, डी.आर. गांधी चौक, जुनी महाराष्ट्र बँक चौक मार्गे खडकी बाजारातील जामा मस्जिद येथे पोहोचेल. त्या भागातही स्थानिक पातळीवर वाहतुकीचे निर्बंध लागू राहतील.
वाहनचालकांसाठी वळवलेले रस्ते व पर्यायी व्यवस्था
मिरवणूक सुरू असताना रास्ता पेठ पॉवर हाऊस ते संत कबीर चौक हा प्रमुख मार्ग पूर्णपणे बंद ठेवण्यात येणार आहे. या मार्गावरील वाहतूक समर्थ पोलिस स्टेशन, के.ई.एम. हॉस्पिटल आणि अपोलो थिएटर मार्गे इतरत्र वळवण्यात येईल. तसेच पद्मजी चौक ते निशांत सिनेमा दरम्यान जाणाऱ्या प्रवाशांनी कॅम्प हायस्कूल रस्त्याचा वापर करायचा आहे.
चुडामन तालीम चौकातील वाहनांना अल्पना सिनेमा मार्ग किंवा जुन्या मोटार स्टँडच्या रस्त्याने जाण्याची मुभा असेल. एम.जी. रोड, कॅम्प, शिवाजी मार्केट, सरबतवाला चौक आणि सेंटर स्ट्रीट भागात मिरवणूक जसजशी पुढे सरकेल, तसतसे तिथले रस्ते तात्पुरते बंद करून वाहतूक पर्यायी मार्गाने सोडली जाईल. मिरवणूक पूर्णपणे पार पडल्यानंतरच त्या-त्या भागातील रस्ते पूर्ववत सुरू केले जातील, त्यामुळे नागरिकांनी पोलिसांच्या सूचनांचे पालन करून सहकार्य करावे, असे आवाहन करण्यात आले आहे.
