Middle East Conflict: इराण, अमेरिका आणि इस्रायल यांच्यातील संघर्ष आता दुसऱ्या महिन्यात दाखल झाला असून या युद्धाची झळ भारतीय नागरिकांनाही बसू लागली आहे. युद्धग्रस्त भागातील वाढत्या शत्रुत्वामुळे आतापर्यंत 8 भारतीय नागरिकांना आपला जीव गमवावा लागला आहे. ताज्या घटनेत, रविवारी कुवेतमध्ये झालेल्या एका भीषण हल्ल्यात आणखी एका भारतीयाचा मृत्यू झाला असून, यामुळे पश्चिम आशियात राहणाऱ्या सुमारे 1 कोटी भारतीयांच्या सुरक्षिततेचा प्रश्न ऐरणीवर आला आहे.
कुवेतच्या ‘डिसालिनेशन प्लांट’वर हल्ला
कुवेत येथील एका ‘डिसालिनेशन प्लांट’वर (पाणी शुद्धीकरण प्रकल्प) झालेल्या हल्ल्यात एका भारतीय कामगाराचा दुर्दैवी मृत्यू झाला. कुवेतमधील भारतीय दूतावासाने सोमवारी ‘X’ (पूर्वीचे ट्विटर) वर पोस्ट करत या घटनेला दुजोरा दिला आहे. दूतावासाने मृताच्या कुटुंबाप्रती शोक व्यक्त केला असून, सर्वतोपरी मदत करण्यासाठी कुवेत प्रशासनाशी जवळचा समन्वय साधला जात असल्याचे स्पष्ट केले आहे. मात्र, सुरक्षेच्या कारणास्तव मृत नागरिकाची सविस्तर ओळख अद्याप जाहीर करण्यात आलेली नाही.
इराणच्या हल्ल्यात सेवा इमारतीचे मोठे नुकसान
कुवेतच्या विद्युत मंत्रालयाने जारी केलेल्या निवेदनानुसार, इराणने कुवेत राज्याला लक्ष्य करत एका वीज आणि पाणी शुद्धीकरण प्रकल्पाच्या आवारातील सेवा इमारतीवर हल्ला केला. या हल्ल्यात भारतीय कामगाराचा मृत्यू झाला असून इमारतीची मोठी पडझड झाली आहे. दरम्यान, या विशिष्ट हल्ल्याबाबत इराणकडून अद्याप कोणतीही अधिकृत प्रतिक्रिया किंवा भाष्य आलेले नाही. स्थानिक माध्यमांनुसार, या प्रकल्पामुळे कुवेतच्या पाणीपुरवठा यंत्रणेवर मोठा परिणाम होण्याची शक्यता आहे.
मध्यपूर्वेतील विविध देशांत भारतीयांचे मृत्यू
28 फेब्रुवारी 2026 रोजी अमेरिका आणि इस्रायलने इराणविरुद्ध लष्करी मोहीम सुरू केल्यापासून भारतीय नागरिकांच्या मृत्यूचे सत्र सुरू झाले आहे. आतापर्यंत विविध देशांत झालेल्या जीवितहानीचा तपशील खालीलप्रमाणे आहे:
कुवेत: 1
सौदी अरेबिया: 1
संयुक्त अरब अमिराती (UAE): 1
ओमान: 2
व्यापारी जहाजांवरील हल्ले: 3
एकूण मृत्यू: 8
Embassy of India in Kuwait expresses its deepest condolences at the tragic demise of an Indian national due to an attack on a desalination facility in Kuwait yesterday. The Embassy is closely coordinating with the Kuwaiti authorities to render all possible support and assistance. — India in Kuwait (@indembkwt) March 30, 2026
1 कोटी भारतीयांच्या सुरक्षेचा गंभीर प्रश्न
पश्चिम आशियामध्ये अंदाजे 1 कोटी भारतीय नागरिक रोजगारासाठी वास्तव्यास आहेत. 24 मार्च रोजी अबू धाबीमध्ये क्षेपणास्त्राचा मलबा कोसळल्याने एका भारतीयाचा मृत्यू झाला होता, तर 18 मार्च रोजी सौदी अरेबियातील रियाधमध्ये आणि 13 मार्च रोजी ओमानमधील सोहार येथे झालेल्या ड्रोन हल्ल्यात दोन भारतीयांनी प्राण गमावले होते. इराणने व्यापारी जहाजांवर केलेल्या हल्ल्यातही 3 भारतीयांचा बळी गेला आहे. युद्धाची व्याप्ती वाढल्यास या विशाल भारतीय समुदायाला मायदेशी परत आणण्याचे मोठे आव्हान भारत सरकारसमोर उभे राहू शकते.
