Trump Third Term : अमेरिकेचे राष्ट्राध्यक्ष डोनाल्ड ट्रम्प यांनी 2028 मधील राष्ट्राध्यक्षपदाच्या निवडणुकीबाबत आणि तिसऱ्या कार्यकाळाबाबत मोठी कबुली दिली आहे. "मला पुन्हा निवडणूक लढवायला नक्कीच आवडेल, परंतु त्याबाबतचा कायदा खूप कडक आहे," असे सांगत ट्रम्प यांनी अमेरिकन संविधानातील घटनात्मक मर्यादा स्पष्टपणे मान्य केल्या आहेत. मेरीलँड येथील 'जॉइंट बेस अँड्र्यूज' येथे प्रसारमाध्यमांशी संवाद साधताना त्यांनी हे विधान केले.
"समर्थकांचा आग्रह, पण घटनात्मक अडथळा"
आपल्या राजकीय समर्थकांकडून वारंवार तिसऱ्यांदा निवडणूक लढवण्याचा आग्रह होत असल्याचे ट्रम्प यांनी नमूद केले. ओहायोमधील 'पॅट्रियट गेम्स' या कार्यक्रमाचा संदर्भ देत ते म्हणाले, "प्रत्येकजण मला तोच प्रश्न विचारत आहे. आजच्या कार्यक्रमातही लोक '2028!' अशा घोषणा देत होते. प्रत्येकाला वाटते की मी पुन्हा निवडणूक लढवावी आणि मलाही ते नक्कीच आवडेल. पण कायदा देशाच्या सर्वोच्च प्रमुखाला दोनपेक्षा जास्त वेळा निवडून येण्यापासून स्पष्टपणे रोखतो." ट्रम्प यांचे हे विधान तिसऱ्या कार्यकाळातील घटनात्मक अडथळ्याची त्यांनी केलेली सर्वात स्पष्ट कबुली मानली जात आहे.
अमेरिकेतील 22 वी घटनादुरुस्ती आणि ट्रम्प यांची अपात्रता
अमेरिकेच्या संविधानातील 22 व्या घटनादुरुस्तीनुसार कोणतीही व्यक्ती दोनपेक्षा जास्त वेळा राष्ट्राध्यक्षपदासाठी निवडून येऊ शकत नाही. 1947 मध्ये काँग्रेसने मंजूर केलेल्या आणि 1951 मध्ये लागू झालेल्या या कायद्यामुळे राष्ट्राध्यक्षांच्या कार्यकाळावर ठाम मर्यादा येते. ट्रम्प यांनी 2016 आणि 2024 च्या निवडणुकांमध्ये विजय मिळवला असल्याने ते या कायदेशीर तरतुदीच्या कक्षेत येतात, ज्यामुळे ते 2028 मध्ये पुन्हा निवडणूक लढवण्यासाठी अपात्र ठरतात.
हेही वाचा – Iran US War : 'ट्रम्प यांचा कार्यकाळ संपेपर्यंत युद्ध सुरू ठेवणार…'; इराणच्या IRGC चा अमेरिकेला गंभीर इशारा
काय आहे ऐतिहासिक पार्श्वभूमी?
पूर्वी अमेरिकेच्या संविधानात राष्ट्राध्यक्षांच्या कार्यकाळावर कोणतीही मर्यादा नव्हती. जॉर्ज वॉशिंग्टन यांनी दोन कार्यकाळ पूर्ण केल्यानंतर पद सोडले होते आणि त्यानंतर सर्व नेत्यांनी या अनौपचारिक प्रथेचे पालन केले. मात्र, फ्रँकलिन डी. रूझवेल्ट यांनी ही प्रथा मोडीत काढत सलग चार वेळा विजय मिळवला होता. रूझवेल्ट यांच्या दीर्घकालीन अध्यक्षपदानंतर भविष्यात अशी परिस्थिती टाळण्यासाठी अमेरिकन काँग्रेसने 22 वी घटनादुरुस्ती आणून दोन कार्यकाळांची मर्यादा कायद्याने निश्चित केली. ट्रम्प यांच्या वक्तव्यामुळे ते निवडणूक लढवण्याच्या तयारीत नसून केवळ कायदेशीर मर्यादांची कबुली देत असल्याचे स्पष्ट झाले आहे.
