Yemen Conflict: इस्लाममधील सर्वात पवित्र शहर असलेल्या मक्केच्या इतिहासात पहिल्यांदाच, सौदी अरेबियाच्या नागरी संरक्षण विभागाने (Civil Defence) संभाव्य हवाई हल्ल्याचा इशारा देणारी आणीबाणीची सूचना जारी केली. या सूचनेद्वारे नागरिकांना सुरक्षित ठिकाणी घरातच राहण्याचा आणि धोका टळेपर्यंत खिडक्या व दरवाजांपासून दूर राहण्याचा सल्ला देण्यात आला. जेद्दाह आणि ताइफ या महत्त्वाच्या भागांसाठीही अशाच प्रकारच्या सूचना जारी करण्यात आल्या होत्या. हा इशारा काही मिनिटांतच मागे घेण्यात आला असला, तरी इराण-समर्थित हुथी गटाकडून सौदी अरेबियाला मिळणाऱ्या वाढत्या सुरक्षा आव्हानांमुळे संपूर्ण देशात चिंतेचे वातावरण पसरले आहे.
मुस्लिम जगतातून तीव्र संताप; OIC कडून हुथींच्या कृत्याचा निषेध
'ऑर्गनायझेशन ऑफ इस्लामिक कोऑपरेशन'ने (OIC) मक्का आणि मदिना या पवित्र भागांना लक्ष्य करणाऱ्या हुथी बंडखोरांच्या हल्ल्यांचा कठोर शब्दांत निषेध केला आहे. OIC ने या हल्ल्यांना 'घोर कृत्य' असे संबोधून, या प्रकारांमुळे सर्वसामान्य नागरिक धोक्यात येत असल्याचे आणि जगभरातील मुस्लिमांच्या भावना दुखावत असल्याचे म्हटले आहे. या संघटनेने पवित्र स्थळे, मशिदी आणि नागरी पायाभूत सुविधांवरील हल्ल्यांना दहशतवादी कृत्य ठरवत सौदी अरेबियाच्या सार्वभौमत्व आणि सुरक्षा उपायांना पूर्ण पाठिंबा दर्शवला आहे.
जाझान ते ताइफपर्यंत क्षेपणास्त्र हल्ले
दरम्यान, 12 सप्टेंबर रोजी येमेनमधून हुथी बंडखोरांनी डागलेले क्षेपणास्त्र जाझान भागात पडले, ज्यामध्ये 2 जण जखमी झाले. तर पुढील दिवशी बॅलिस्टिक क्षेपणास्त्रे आणि ड्रोनच्या सहाय्याने केलेल्या हल्ल्यांत 13 नागरिक जखमी झाले असून 7 घरे व 2 वाहनांचे नुकसान झाले. याशिवाय, 11 सप्टेंबर रोजी झालेल्या ड्रोन हल्ल्यानंतर सौदीने आपली 1,200 किलोमीटर लांबीची पूर्व-पश्चिम तेल वाहिनी बंद केली. दररोज सुमारे 5 दशलक्ष बॅरल तेलाच्या वाहतुकीसाठी ही लाईन अत्यंत महत्त्वाची आहे. तसेच हुथींनी 'पेरिम बेट' आणि 'मोचा' बंदरावर ताबा मिळवून 'बाब अल-मंदाब' या महत्त्वाच्या सागरी मार्गावर आपले नियंत्रण वाढवले आहे.
रियाधसमोर लष्करी पर्यायांचा पेच; व्यापक युद्धाची शक्यता
सौदी अरेबियाकडे अत्याधुनिक लष्करी सामर्थ्य असले तरी हुथी बंडखोरांचे आव्हान दिवसेंदिवस गुंतागुंतीचे होत चालले आहे. तज्ज्ञांच्या मते, रियाध पूर्ण क्षमतेचे युद्ध टाळण्याचा प्रयत्न करत असला, तरी सातत्याने होणाऱ्या हल्ल्यांमुळे त्यांना मोठ्या प्रमाणावर प्रत्युत्तराची कारवाई करणे भाग पडू शकते. मात्र, सौदीने कोणतीही मोठी लष्करी कारवाई केल्यास, त्याचे रूपांतर दीर्घकाळ चालणाऱ्या संघर्षात होऊ शकते आणि सौदी अरेबिया अमेरिका-इराणमधील तणावात अधिक खोलवर ओढला जाण्याची शक्यता वर्तवली जात आहे.
