New SIM Card Rules: देशभरातील वाढत्या डिजिटल फसवणुकीला आणि ओळख चोरीच्या प्रकारांना आळा घालण्यासाठी केंद्र सरकारने मोबाईल सिम कार्ड वितरणाचे नियम अधिक कडक केले आहेत. दूरसंचार (वापरकर्ता ओळख) नियम, 2026 अंतर्गत आता नवीन मोबाईल कनेक्शन मिळवण्यासाठी बायोमेट्रिक केवायसी (Biometric KYC) अनिवार्य करण्यात आले आहे. या नव्या धोरणाची संपूर्ण माहिती दूरसंचार विभागाच्या (DoT) अधिकृत पोर्टलवर प्रसिद्ध करण्यात आली असून, यामुळे कोणत्याही भुलथापा देऊन किंवा दुसऱ्याच्या नावे सिम कार्ड खरेदी करण्याच्या बेकायदेशीर मार्गांना पूर्णपणे आळा बसणार आहे.
नवीन कनेक्शनसह सिम बदलण्यासाठीही कडक पडताळणी
आता ग्राहकांना नवीन सिम कार्ड खरेदी करताना आपली थेट शारीरिक उपस्थिती आणि बायोमेट्रिक पडताळणी देणे बंधनकारक असेल. नोंदणीकृत ओळखपत्रांनुसार ही प्रक्रिया ई-केवायसी (e-KYC) किंवा डिजिटल केवायसी (D-KYC) द्वारे पार पाडली जाईल. विशेष म्हणजे, हा नियम फक्त नवीन सिम कार्ड खरेदीपुरता मर्यादित नसून, जुने सिम हरवल्यास नवीन सिम घेताना, किंवा नाव, लिंग आणि जन्मतारीख यांसारख्या वैयक्तिक माहितीत बदल करतानाही लागू होणार आहे. तसेच, कॉर्पोरेट किंवा व्यावसायिक कनेक्शनसाठी मूळ मालकासोबतच प्रत्यक्ष वापरकर्त्याची (End User) पडताळणी केली जाणार आहे.
बनावट कागदपत्रांवर पोलिसांची कारवाई; असा राहील डेटा सुरक्षित
कोणी चुकीचे तपशील, बनावट दस्तऐवज किंवा दुसऱ्याच्या ओळखीचा गैरवापर करून सिम मिळवण्याचा प्रयत्न केला, तर संबंधित प्रकरण थेट पोलिसांकडे सोपवले जाईल आणि ते कनेक्शन तातडीने रद्द केले जाईल. ग्राहकांच्या सुरक्षेसाठी बायोमेट्रिक प्रक्रिया पूर्ण होताच त्यांच्या मोबाईलवर सूचना (Alert) पाठवली जाईल. याशिवाय, ग्राहकांचा बायोमेट्रिक डेटा सिम विक्री केंद्रांवर (PoS) अजिबात साठवला जाणार नाही. हा सर्व डेटा एनक्रिप्टेड स्वरूपात थेट दूरसंचार कंपनीच्या सुरक्षित सर्व्हरवर पाठवला जाणार असल्याने ग्राहकांची खासगी माहिती पूर्णपणे सुरक्षित राहील.
