PM Modi Instagram video : भारताच्या 80 व्या स्वातंत्र्यदिनाच्या पाश्वभूमीवर देशभरात उत्साहाचे वातावरण निर्माण झाले असून पंतप्रधान नरेंद्र मोदी यांनी राष्ट्रध्वजाचा गौरव वाढवण्यासाठी एक विशेष व्हिडिओ संदेश शेअर केला आहे. आपल्या अधिकृत इन्स्टाग्राम हँडलवरून हा व्हिडिओ प्रसिद्ध करत त्यांनी सर्व देशवासियांना या राष्ट्रीय उत्सवात उत्स्फूर्तपणे सहभागी होण्याचे आवाहन केले आहे. 15 ऑगस्ट हा केवळ एक सण नसून तो देशाच्या स्वातंत्र्यासाठी बलिदान देणाऱ्या हुतात्म्यांना अभिवादन करण्याचा आणि एका समृद्ध राष्ट्राच्या उभारणीचा पुनरुच्चार करण्याचा दिवस आहे, असे प्रतिपादन त्यांनी केले. ‘हर घर तिरंगा’ मोहिमेच्या माध्यमातून प्रत्येक नागरिकाने आपल्या घरावर स्वाभिमानाचे प्रतीक असलेला राष्ट्रध्वज फडकवून या ऐतिहासिक क्षणाचे साक्षीदार व्हावे, अशी विनंती त्यांनी केली.
‘हर घर तिरंगा’ मोहिमेची व्याप्ती
वर्षांनुवर्षांची परंपरा पुढे नेणारी ‘हर घर तिरंगा’ मोहीम ही 2022 मध्ये ‘आझादी का अमृत महोत्सव’ अंतर्गत सुरू करण्यात आली होती. आज या उपक्रमाने एका व्यापक जनआंदोलनाचे रूप धारण केले आहे. देशभरातील विविध राज्यांमध्ये तिरंगा रॅली आणि देशभक्तीपर कार्यक्रमांचे आयोजन केले जात आहे. नुकत्याच पार पडलेल्या एनडीए खासदारांच्या बैठकीतही खासदारांनी तिरंगा हातात धरून ‘भारत माता की जय’ आणि ‘वंदे मातरम’च्या जयघोषात पंतप्रधानांचे स्वागत केले. हा राष्ट्रध्वज आपल्याला राष्ट्राच्या प्रगतीसाठी अविरत कार्य करण्याची आणि ‘विकसित भारत’ घडवण्याची प्रेरणा देतो, यावर पंतप्रधानांनी आपल्या संदेशात भर दिला.
डिजिटल जगतात पंतप्रधान मोदींचे वर्चस्व
पंतप्रधान नरेंद्र मोदींचा हा नवा व्हिडिओ इंटरनेटवर अपलोड होताच क्षणार्धात प्रचंड वेगाने व्हायरल झाला आहे. डिजिटल प्लॅटफॉर्मवर जागतिक स्तरावर सर्वाधिक पसंती मिळवणाऱ्या नेत्यांमध्ये त्यांचा समावेश होतो. इन्स्टाग्रामवर त्यांचे 106 मिलियनहून अधिक, तर ‘X’ (ट्विटर) वर 107 मिलियनहून अधिक फॉलोअर्स आहेत. याआधीही त्यांच्या अनेक व्हिडिओंनी डिजिटल विश्वात व्ह्यूव्जचे नवे विक्रम स्थापित केले आहेत. या व्हिडिओच्या माध्यमातून त्यांनी थेट तरुणाईशी संवाद साधत देशप्रेमाची ज्योत तेवत ठेवण्याचे आणि राष्ट्रीय ऐक्याचा संदेश घरोघरी पोहोचवण्याचे यशस्वी प्रयत्न केले आहेत.
