Nitish Kumar JDU Shiromani Akali Dal Alliance : बिहारमध्ये एनडीए (NDA) आघाडीला मोठे यश मिळाल्यानंतरही राजकीय पटलावर वेगाने चक्रे फिरली आहेत. मुख्यमंत्री नितीश कुमार यांनी आपल्या पदाचा राजीनामा दिल्यानंतर 15 एप्रिल 2026 रोजी भाजप नेते सम्राट चौधरी यांनी बिहारच्या मुख्यमंत्रिपदाची सूत्रे हाती घेतली होती. या घडामोडींनंतर जेडीयू (JDU) आणि भाजपमधील दरी अधिकच रुंदावली असून, समान नागरी संहितेच्या (UCC) मुद्द्यावरही जेडीयूने भाजपला पाठिंबा दिला नव्हता. आता राजीनाम्यानंतर नितीश कुमारांनी भाजपला आणखी एक मोठा धक्का देत पंजाब विधानसभेसाठी थेट वेगळी चूल मांडण्याचा निर्णय घेतला आहे.
पंजाब विधानसभेसाठी शिरोमणी अकाली दलासोबत (SADSAS) जेडीयूची अधिकृत युती
पुढील वर्षी म्हणजेच 2027 मध्ये होणाऱ्या पंजाब विधानसभा निवडणुकीची तयारी जेडीयूने आत्तापासूनच अत्यंत जोमाने सुरू केली आहे. केंद्रात आणि बिहारमध्ये भाजपसोबत एनडीएमध्ये प्रमुख घटक पक्ष असूनही, पंजाबमध्ये मात्र जेडीयूने भाजपला सोडचिठ्ठी दिली आहे. जेडीयूने पंजाबमध्ये ‘शिरोमणी अकाली दल श्री आनंदपूर साहिब’ (SADSAS) या पक्षाशी अधिकृत युती जाहीर करून सर्वांनाच धक्का दिला आहे. या नव्या समीकरणामुळे आगामी निवडणुकीत पंजाबमधील राजकीय संघर्ष कमालीचा रंजक ठरण्याची शक्यता आहे.
हेही वाचा – Mamata Banerjee: ‘मुख्य निवडणूक आयुक्तांना अटक करा…’; ममता बॅनर्जींची मोठी मागणी; नेमकं काय म्हणाल्या?
संजय दत्त यांच्या बहिणीचा जेडीयूत प्रवेश; सर्व जागांवर उमेदवार उभे करण्याची घोषणा
या राजकीय घडामोडींदरम्यान, प्रसिद्ध अभिनेते सुनील दत्त यांची पुतणी आणि संजय दत्त यांची चुलत बहीण ममता दत्त यांनी अधिकृतपणे जेडीयूमध्ये प्रवेश केला आहे. जेडीयूचे पंजाब प्रदेशाध्यक्ष मलविंदर सिंह बेनीपाल यांनी माहिती देताना सांगितले की, समविचारी पक्षांना एकत्र आणण्यासाठी ही युती करण्यात आली आहे. ‘SADSAS’ आणि जेडीयू ही युती पंजाबमधील विधानसभेच्या सर्वच्या सर्व जागांवर आपले उमेदवार उभे करणार असल्याचेही त्यांनी स्पष्ट केले आहे.
पंजाबमध्ये भाजप, आप आणि काँग्रेससमोर जेडीयूचे नवे आव्हान
नितीश कुमार यांच्या या अनपेक्षित आणि आक्रमक भूमिकेमुळे पंजाबच्या राजकारणात भाजपची अडचण वाढण्याची शक्यता आहे. आता पंजाबमध्ये सत्ताधारी आम आदमी पार्टी (AAP), काँग्रेस आणि भाजप यांच्याशिवाय जेडीयू-अकाली दल युतीचेही मोठे आव्हान प्रतिस्पर्ध्यांसमोर उभे राहिले आहे. बिहारमधील मुख्यमंत्रिपद सोडल्यानंतर नितीश कुमारांनी घेतलेला हा पहिलाच मोठा राष्ट्रीय राजकीय निर्णय मानला जात असून, आगामी काळात त्यांची पुढची वाटचाल कशी राहते याकडे संपूर्ण देशाचे लक्ष लागले आहे.
