Kriti Sanon Bralette Dress and Dog Rakhi Controversy: बॉलीवूड अभिनेत्री क्रिती सेनॉन सध्या एका दागिन्यांच्या ब्रँडसाठी केलेल्या रक्षाबंधन जाहिरातीमुळे मोठ्या वादात अडकली आहे. रक्षाबंधनानिमित्त प्रदर्शित करण्यात आलेल्या या जाहिरातीतील तिचा पोशाख आणि तिने भावासोबतच श्वानाला बांधलेली राखी यामुळे नेटकऱ्यांचा संताप अनावर झाला आहे. सणाच्या परंपरेचा आणि हिंदू संस्कृतीचा अवमान केल्याचा गंभीर आरोप करत सोशल मीडियावर तिच्यावर जोरदार टीका केली जात आहे.
पारंपरिक सणाला इंडो-वेस्टर्न लूक; आउटफिटवरून नेटकऱ्यांचे प्रश्न
रक्षाबंधन हा बहीण-भावाच्या नात्यातील अत्यंत पवित्र आणि पारंपरिक सण मानला जातो. मात्र, या जाहिरातीमध्ये क्रिती सेनॉनने पारंपरिक कपड्यांऐवजी इंडो-वेस्टर्न पोशाख परिधान केला होता. तिने ऑफ-व्हाइट रंगाचा ब्रालेट स्टाइल ब्लाऊज, ड्रेप केलेला स्कर्ट आणि त्यावर केप परिधान केल्याचे दिसून येते. सणाच्या जाहिरातीसाठी अशा प्रकारचा अश्लील दिसणारा पोशाख परिधान करण्याच्या प्रकारावर नेटकऱ्यांनी तीव्र आक्षेप घेतला आहे.
हेही वाचा – Toxic Event Accident: प्रसिद्ध अभिनेत्याच्या प्री-रिलीज इव्हेंटमध्ये अपघात; साऊंड सिस्टम कोसळली; 2 जखमी
श्वानाला राखी बांधण्याच्या प्रकारावर उठले वादळ
या जाहिरातीत दाखवण्यात आलेल्या एका विशिष्ट प्रसंगावरून वादाची ठिणगी आणखी पेटली आहे. क्रिती सेनॉन भावाच्या आधी एका श्वानाला राखी बांधताना दिसते आणि तो श्वान तिच्यावर भुंकताना दाखवला आहे. श्वान हा घरातील एक महत्त्वाचा सदस्य असून त्याच्याप्रती असणारे प्रेम व्यक्त करणे हा जाहिरातदारांचा उद्देश असू शकतो. परंतु, नेटकऱ्यांना हा प्रकार अजिबात आवडलेला नाही. सण-उत्सवांच्या काळात अशा प्रकारच्या जाहिरातींमुळे हिंदू धर्माच्या भावना दुखावल्या जात असल्याचा सूर सोशल मीडियावर पाहायला मिळत आहे.
FIR दाखल करण्याची सोशल मीडियावरून मागणी; ब्रँड आणि अभिनेत्रीचे मौन
व्हायरल झालेल्या या व्हिडिओवर नेटकऱ्यांनी अत्यंत जळजळीत प्रतिक्रिया व्यक्त केल्या आहेत. ‘आरतीचे ताट कुठे आहे आणि हे कसले कपडे घातले आहेत?’, असा सवाल करत अनेकांनी सणाचा अनादर झाल्याचे म्हटले आहे. काहींनी केवळ पैशांसाठी सणांचे महत्त्व कमी करण्याचा प्रयत्न केल्याचा आरोप केला आहे, तर एका नेटकऱ्याने ही जाहिरात भारतीय परंपरेशी सुसंगत नसून अत्यंत आक्षेपार्ह असल्याचे सांगत क्रिती आणि जाहिरात कंपनीविरोधात लवकरच एफआयआर (FIR) दाखल करण्याची मागणी केली आहे. या वाढत्या वादानंतर आणि ट्रोलिंगनंतरही संबंधित दागिन्यांच्या ब्रँडने किंवा अभिनेत्री क्रिती सेनॉनने अद्याप कोणतीही अधिकृत प्रतिक्रिया दिलेली नाही.
हेही वाचा – Shalini Thackeray: श्वेता तिवारीच्या आरोपांवर मनसे आक्रमक; शालिनी ठाकरेंनी थेट पोस्ट करत सुनावले खडे बोल
