Kandula Jessie : आंध्र प्रदेशातील धवलेश्वरम येथील एका अत्यंत साध्या आणि कष्टकरी कुटुंबातील 14 वर्षांच्या मुलीने आपल्या तीव्र जिज्ञासू वृत्तीच्या जोरावर एक ऐतिहासिक यश संपादन केले आहे. स्थानिक जिल्हा परिषद शासकीय हायस्कूलमध्ये दहावीत शिकणाऱ्या या मुलीचे नाव कंडुला जेसी असे आहे. जिथे तिचे वर्गमित्र केवळ शालेय परीक्षेच्या तयारीत व्यस्त होते, तिथे कंडुलाने विज्ञानाच्या सीमा ओलांडत थेट अंतराळ क्षेत्रातील एका जागतिक मोहिमेत स्वतःचे स्थान पक्के केले आहे. तिची ही कामगिरी आज देशभरातील सरकारी शाळांमधील लाखो विद्यार्थ्यांसाठी आशेचा नवा किरण ठरली आहे.
जागतिक पातळीवरील 'शक्तीसॅट' मोहिमेत निवड
कंडुला जेसीची निवड 'शक्तीसॅट' या जगप्रसिद्ध आणि अत्यंत महत्त्वाकांक्षी चंद्र मोहिमेसाठी झाली आहे. ही जगातील पहिलीच अशी आंतरराष्ट्रीय मोहीम आहे, जी पूर्णपणे मुलींच्या नेतृत्वाखाली राबवली जात असून यात केवळ विद्यार्थिनींचाच सहभाग आहे. या मोहिमेसाठी जगभरातील 108 देशांमधून जवळपास १२ हजार पेक्षा जास्त गुणवंत विद्यार्थ्यांनी अर्ज केले होते. त्यामधून निवडल्या गेलेल्या अवघ्या 20 भारतीय विद्यार्थ्यांमध्ये कंडुलाचा समावेश आहे; विशेष म्हणजे संपूर्ण आंध्र प्रदेशातून निवड झालेली ती एकमेव विद्यार्थिनी ठरली आहे.
ल्युनर क्यूबसॅट निर्मिती आणि तांत्रिक प्रशिक्षण
या आगळ्यावेगळ्या मोहिमेअंतर्गत विद्यार्थिनींचा एक गट 'ल्युनर क्यूबसॅट' (लहान आकाराचा उपग्रह) विकसित करत आहे. हा क्यूबसॅट 11 ऑक्टोबर रोजी इस्रोच्या श्रीहरिकोटा केंद्रावरून अवकाशात सोडला जाणार आहे. या मोहिमेची पूर्वतयारी म्हणून कंडुला सध्या उपग्रह प्रणाली (सॅटेलाइट सिस्टिम्स), अंतराळ विज्ञान आणि आधुनिक तांत्रिक विषयांचे कसून प्रशिक्षण घेत आहे. वयाच्या अवघ्या 14 व्या वर्षी अंतराळ विज्ञानातील गुंतागुंतीचे धडे गिरवून उपग्रह निर्मितीत मोलाचा वाटा उचलणे ही तिची कामगिरी कौतुकास्पद मानली जात आहे.
परिस्थितीवर मात करत रचला इतिहास
कंडुलाचा हा प्रवास सोपा नव्हता. तिचे वडील सुतारकाम करून कुटुंबाचा उदरनिर्वाह चालवतात. आर्थिक अडचणींमुळे तिच्या पालकांनी तिला खाजगी शाळेतून काढून सरकारी शाळेत दाखल केले होते. मात्र, कौटुंबिक गरिबी आणि संसाधनांचा अभाव तिच्या स्वप्नांच्या आड आला नाही. जिद्द आणि कठोर परिश्रमाच्या जोरावर तिने दाखवून दिले की, मोठी स्वप्ने पाहण्यासाठी भव्य शाळांपेक्षा मनात जिद्द असणे अधिक महत्त्वाचे असते. तिच्या या यशाने तिच्या कुटुंबाचा, शाळेचा आणि संपूर्ण राज्याचा गौरव वाढवला आहे.
