Nepal Flood: नेपाळमध्ये आलेल्या विनाशकारी पुरामुळे निर्माण झालेली परिस्थिती अत्यंत भीषण आणि हृदयद्रावक बनली आहे. देशभरात पुरामुळे मृतांचा आकडा 962 वर पोहोचला असून 4,000 हून अधिक नागरिक अद्याप बेपत्ता आहेत. दरम्यान, पुराचा सर्वाधिक फटका बसलेल्या नुवाकोट जिल्ह्यातील बिदुर नगरपालिकेतील बेत्रावती गावात एक अत्यंत धक्कादायक घटना समोर आली आहे. भोटे कोसी नदीला आलेल्या पुरामुळे वाहून आलेल्या ढिगाऱ्याखाली गाडल्या गेलेल्या एका तीन मजली घरातून तब्बल 23 मृतदेह बाहेर काढण्यात आले आहेत. यामध्ये एकाच खोलीतून 21 तर घराबाहेर 2 मृतदेह सापडले. 26 ऑगस्ट रोजी वेगाने आलेल्या पुराच्या पाण्यापासून जीव वाचवण्यासाठी हे सर्वजण छताखालील वरच्या खोलीत एकत्र जमले असावेत, परंतु दुर्दैवाने संपूर्ण घर ढिगाऱ्याखाली दाबले गेले. मृतदेहांमध्ये एका महिलेने लहान मुलीला आपल्या कुशीत घट्ट धरून ठेवल्याचे निष्पन्न झाले. मृतदेहांच्या शेजारी बॅगा आढळल्याने ते गोसाईकुंडाला जाणारे यात्रेकरू असावेत असा संशय नुवाकोटचे पोलीस अधीक्षक बिपिन रेग्मी यांनी व्यक्त केला आहे.
उत्तरगया गावात 350 विद्यार्थी बेपत्ता; जलविद्युत प्रकल्पांमधील कर्मचाऱ्यांशी संपर्क तुटला
नेपाळमधील रसुवा जिल्ह्यातील परिस्थिती देखील अत्यंत बिकट झाली आहे. येथील उत्तरगया गावातून सुमारे 350 विद्यार्थी बेपत्ता झाले असून त्यांचा शोध घेण्यासाठी व्यापक मोहीम राबवली जात आहे. याशिवाय, त्रिशुली 3A (Trishuli 3A) जलविद्युत प्रकल्पाच्या ठिकाणी सलग 6 दिवसांपासून बचावकार्य अडकून पडले असून तेथील 40 ते 42 अभियंत्यांचा शोध घेण्याचे प्रयत्न सुरू आहेत. तसेच त्रिशुली 3B (Trishuli 3B) प्रकल्पातील 118 कर्मचाऱ्यांशीही अद्याप कोणताही संपर्क होऊ शकलेला नाही.
भारतीय बचाव पथकांचे शोधकार्य तीव्र; बोगद्यात अडकलेल्या कर्मचाऱ्यांना बाहेर काढण्यात यश
नेपाळमधील या महाप्रलयात भारतीय बचाव पथकांनी आपली शोध व मदत मोहीम अधिक तीव्र केली आहे. अत्यंत प्रतिकूल हवामान आणि दुर्गम भूप्रदेशाचे आव्हान असतानाही, नेपाळी सैन्याच्या सहकार्याने भारतीय तज्ज्ञ पथके अहोरात्र काम करत आहेत. रसुवा जिल्ह्यातील चिलिमे आणि लांगटांग येथील बोगद्यांमध्ये अडकलेल्या कर्मचाऱ्यांना सुरक्षित बाहेर काढण्यात भारतीय पथकाला सुरुवातीचे मोठे यश मिळाले आहे.
