वॉशिंग्टन : अमेरिकेचे परराष्ट्र मंत्री मार्को रुबिओ यांना असे वाटत नाही की, भारत आणि इराण सध्या एखाद्या व्यापार कराराबाबत वाटाघाटी करत आहेत. किर्गिस्तानमधील बिश्केक येथे झालेल्या शांघाय सहकार्य संघटनेच्या (SCO) 26 व्या शिखर परिषदेदरम्यान पंतप्रधान नरेंद्र मोदी आणि इराणचे राष्ट्राध्यक्ष मसूद पेझेश्कियान यांच्यात झालेल्या भेटीबाबत विचारले असता त्यांनी हे मत व्यक्त केले. ‘द ब्रायन किल्मीड शो’मध्ये रुबिओ यांना मोदी आणि पेझेश्कियान यांच्या भेटीबद्दल तसेच भारत आणि इराण एखाद्या व्यापार कराराच्या दिशेने काम करत आहेत का, याबद्दल विचारण्यात आले. “मला नाही वाटत की भारत आणि इराणमध्ये कोणताही व्यापार करार आहे,” असे रुबिओ म्हणाले. त्यांनी नमूद केले की देश आपली स्वतःची परराष्ट्र धोरणे ठरवतात आणि अनेक देश इराणच्या सरकारशी संपर्क ठेवून असतात. “अर्थातच, प्रत्येक देश आपले स्वतःचे परराष्ट्र धोरण आखत असतो आणि जगभरातील अनेक देश इराणच्या राजवटीशी संवाद साधतात,” असे रुबिओ म्हणाले.
मात्र, रुबिओ यांनी पुन्हा एकदा स्पष्ट केले की, कोणत्याही देशाने इराणला अमेरिकेचे निर्बंध टाळण्यास मदत करू नये किंवा तेहरानसाठी महसूल मिळवून देणारे मार्ग निर्माण करू नयेत. “मला वाटते की शेवटी महत्त्वाचे हेच आहे आणि राष्ट्राध्यक्ष डोनाल्ड ट्रम्प यांबाबत अत्यंत स्पष्ट राहिले आहेत, की कोणत्याही देशाने इराणला निर्बंधांपासून वाचण्यास मदत करू नये,” असे रुबिओ म्हणाले. “कोणत्याही देशाने त्यांना अशी यंत्रणा उभारण्यास मदत करू नये, ज्याद्वारे ते महसूल मिळवू शकतील आणि त्या पैशांचा वापर दहशतवादाला खतपाणी घालण्यासाठी व अणुशस्त्र बनवण्याचा प्रयत्न करण्यासाठी करतील,” असे त्यांनी पुढे नमूद केले. अशा यंत्रणांना चालना देणारे देश स्वतःच अमेरिकेच्या निर्बंधांच्या कक्षेत येऊ शकतात, असे त्यांनी सांगितले. “आणि जर देशांनी असे करण्याचे ठरवले, तर आम्हाला त्यांच्यावरही निर्बंध घालावे लागतील,” असे अमेरिकेच्या परराष्ट्र मंत्र्यांनी म्हटले.
Met President Masoud Pezeshkian in Bishkek. Reiterated our commitment to strengthening India’s long standing friendship with Iran across diverse sectors. We want to expand and diversify our trade basket in the times to come. We had a discussion on the prevailing situation in… pic.twitter.com/qagQy5o108 — Narendra Modi (@narendramodi) August 31, 2026
दरम्यान, इराणसोबतचे दीर्घकालीन संबंध दृढ करण्यास आणि द्विपक्षीय व्यापार वाढवण्यास भारत कटिबद्ध असल्याचे पंतप्रधान मोदींनी सांगितले. “बिश्केक येथे राष्ट्राध्यक्ष मसूद पेझेश्कियान यांची भेट घेतली. विविध क्षेत्रांमध्ये इराणसोबतची भारताची दीर्घकालीन मैत्री अधिक दृढ करण्याच्या आमच्या कटिबद्धतेचा पुनरुच्चार केला. आगामी काळात आम्हाला आमच्या व्यापाराची व्याप्ती वाढवायची आहे आणि त्यात विविधता आणायची आहे,” असे पंतप्रधान मोदींनी या भेटीनंतर ‘एक्स’ (X) वर म्हटले.
पंतप्रधानांनी सांगितले की, दोन्ही नेत्यांनी या क्षेत्रातील परिस्थिती आणि शाश्वत शांतता प्रस्थापित करण्याच्या प्रयत्नांना भारताचा असलेला पाठिंबा यांवरही चर्चा केली. परराष्ट्र मंत्रालयाने ही बैठक “फलदायी” असल्याचे म्हटले असून, नेत्यांनी द्विपक्षीय संबंधांचा आणि पश्चिम आशियातील अलीकडील घडामोडींचा आढावा घेतल्याचे सांगितले. परराष्ट्र मंत्रालयाचे प्रवक्ते रणधीर जयस्वाल यांनी सांगितले की, प्रादेशिक प्रश्न “संवाद आणि मुत्सद्देगिरी” द्वारे सोडवले जावेत, ही भारताची सातत्यपूर्ण भूमिका मोदींनी पुन्हा एकदा स्पष्ट केली.
