Earthquake : भारताचा शेजारील देश असलेल्या म्यानमारमध्ये गेल्या काही दिवसांपासून भूकंपाचे सत्र सुरू असून नागरिकांमध्ये भीतीचे वातावरण आहे. राष्ट्रीय भूकंपशास्त्र केंद्राने (NCS) दिलेल्या माहितीनुसार, शनिवारी पहाटे 3:01 वाजता म्यानमारमध्ये 3.9 रिश्टर स्केल तीव्रतेचा भूकंप झाला. या भूकंपाचा केंद्रबिंदू जमिनीखाली 85 किलोमीटर खोलीवर होता. सुदैवाने या धक्क्यामुळे कोणतीही जीवितहानी झाल्याचे वृत्त नाही, मात्र वारंवार येणाऱ्या भूकंपांमुळे लोक धास्तावले आहेत.
एका आठवड्यात भूकंपांचे सत्र
म्यानमारमध्ये गेल्या 7 दिवसांत भूकंपांची मालिकाच पाहायला मिळाली आहे. शुक्रवारी या भागात 4.9 तीव्रतेचा धक्का बसला होता, तर त्यापूर्वी 3 फेब्रुवारीला 5.3 आणि 2 फेब्रुवारीला 4.5 रिश्टर स्केलचे भूकंप नोंदवले गेले. विशेषतः 3 फेब्रुवारीला झालेला भूकंप केवळ 20 किलोमीटर खोलीवर असल्याने त्याचे हादरे अधिक तीव्र होते. वारंवार बसणाऱ्या या धक्क्यांमुळे लोकांना रात्रीची झोप घेणेही कठीण झाले असून, भविष्यात मोठ्या विनाशाची शक्यता वर्तवली जात असल्याने घबराट वाढली आहे.
हेही वाचा – Sudan Drone Attack: सुदानमध्ये विस्थापितांच्या ताफ्यावर ड्रोन हल्ला; आठ मुलांसह 24 जणांचा करुण अंत
प्रमुख शहरांना विनाशाचा धोका
म्यानमारमधील सागाइंग, मंडाले, बागो आणि यांगून यांसारखी मोठी शहरे भूकंपप्रवण क्षेत्रात येतात. देशातील सुमारे 46 टक्के लोकसंख्या याच भागात वास्तव्यास आहे. दाट लोकवस्ती असलेले यांगून शहर फॉल्ट लाईनच्या जवळ असल्याने तिथे धोका अधिक आहे. 1903 मध्ये बागोमध्ये झालेल्या 7 रिश्टर स्केलच्या भूकंपाने यांगूनपर्यंत मोठी हानी केली होती, त्या आठवणीने स्थानिक नागरिक आता सुरक्षित पर्यायांच्या शोधात आहेत.
EQ of M: 3.9, On: 07/02/2026 03:01:45 IST, Lat: 24.76 N, Long: 94.74 E, Depth: 85 Km, Location: Myanmar.
For more information Download the BhooKamp App https://t.co/5gCOtjdtw0 @DrJitendraSingh @OfficeOfDrJS @Ravi_MoES @Dr_Mishra1966 @ndmaindia pic.twitter.com/AVuIe7T7FI — National Center for Seismology (@NCS_Earthquake) February 6, 2026
चार टेक्टोनिक प्लेट्सचे भूगर्भीय जाळे
म्यानमारची भौगोलिक रचना अत्यंत संवेदनशील आहे, कारण हा देश भारतीय, युरेशियन, सुंदा आणि बर्मा या चार टेक्टोनिक प्लेट्सच्या संगमावर वसलेला आहे. येथील 1,400 किलोमीटर लांबीचा ‘सागिंग फॉल्ट’ भूगर्भीय हालचालींसाठी ओळखला जातो. तज्ज्ञांच्या मते, खोलवर होणाऱ्या भूकंपांपेक्षा उथळ भूकंप अधिक विनाशकारी असतात कारण त्यांच्या लाटा पृष्ठभागावर वेगाने पोहोचतात. म्यानमारचा मोठा किनारा आणि ही भौगोलिक रचना पाहता, देशाला भूकंप आणि त्सुनामी अशा दोन्ही संकटांचा मोठा धोका आहे.
